„ახალი საქართველოს“ ლიდერი გიორგი ვაშაძე სოციალურ ქსელში გავრცელებულ სკანდალურ ფოტოებთან დაკავშირებით ჟურნალისტებთან განმარტებას აკეთებს. სოციალურ ქსელში გივი თარგამაძემ ზვიად ჯანყარაშვილის, ფინანსთა მინისტრ ნოდარ ხადურისა და გიორგი ვაშაძის ერთობლივი ფოტოები გაავრცელა.
ვაშაძე ხადურთან და ჯანყარაშვილთან მეგობრობას უარყოფს და აცხადებს, რომ ,,პოლიტიკური ოპონირება არ ნიშნავს იმას, რომ ერთმანეთს თავ-პირი უნდა ვამტვრიოთ“.
„მეუღლესთან და შვილებთან ერთად ჩამოვედი ჩაქვში, სადაც შემთხვევით შევხვდი ამ ადამიანებს. პოლიტიკური ოპონირება არ ნიშნავს იმას, რომ ერთმანეთს თავ-პირი უნდა ვამტვრიოთ. ზოგადი საუბარი გვქონდა მე და ბატონ ჯანყარაშვილს. როგორც ვიცი, ორი წელია არც ხელისუფლებაშია და არც არსად, პირველად ვნახე და გავიცანი. რაც შეეხება ხადურს, ყველას ვურჩევ სურათები გადაიღოს მათთან ერთად, იმიტომ, რომ 9 ოქტომბერს მინისტრები აღარ იქნებიან და მერე შეიძლება ვეღარც შეძლონ ეს. ვიღაცამ გადაგვიღო ფოტო და გახდა ეს სკანდალი, მეგობრული ურთიერთობა არ გვაქვს. ბავშვები მღეროდნენ და მშობლები უყურებდნენ ამ სიტუაციას, მეტი არაფერი. პატარა სასტუმროა და ყველა დამსვენებელი იქ იყრის თავს“, - აღნიშნა გიორგი ვაშაძემ.
რაც შეეხება გივი თარგამაძეს, მის მიერ გამოქვეყნებულ ფოტოებთან დაკავშირებით ის წერს: ,,გაშალა ფრთები ბიჭმა - აქეთ ჯანყარაშვილი, იქეთ ხადური, სიტკბო სუფევდა გუშინ გადაპორტირებური ბუკიას სასტუმროში ჩაქვში. პარტიის ანგარიშიც ყვავის - უკვე 900 ათასი აქვს შემოწირულობა "გულშემატკივრებისგან". ამას ფარცხალაძესთან ერთადაც ექნება უეჭველი სიგრილეში საზამთროზე კბილი გაკრული, ვანო ჩხარტიშვილის ოჯახური გვერდში დგომით. ხოდა აბა ტარიელ ონიანის ბავშვის ნათლობაში პაატა ბურჭულაძე გაუკვირდებოდა? ან პაატას გაუკვირდება ეს სიტკბო? თუ ზურა ჯაფარიძე შეშფოთდება? ან პალიკო კუბლაშვილი, გოგი მელაძე, გოგა ხაჩიძე? როცა პირველადაც არაა ძნელი ღალატი, მერე მიდის შხუილშხუილით. ერთმანეთსაც რომ გაყიდით, არ გამომაპაროთ, პერსპექტიულებო...“
