ტურისტული პროდუქტების განვითარების სააგენტოს ორგანიზებით ქედის ღვინის მარშრუტზე გიდებისთვის ინფოტური ჩატარდა. ტურის მონაწილეებმა მარშრუტზე არსებული ყველა საოჯახო სასტუმრო სახლი, მარანი და ტურისტული ობიექტი მოინახულეს. მათ შორის ქედაში მდებარე ღვინისა და ჯემების ქარხნები, სადაც ადგილობრივი წარმოების ღვინის გარდა ჯემებს, მურაბებს, წვენებსა და ფელამუშს ამზადებენ. ობიექტი განსაკუთრებით საინტერესოა ტურისტებისთვის, რომლებსაც ნატურალური, ადგილობრივი წარმოების პროდუქციის შეძენა სურთ. მათი ყიდვა ასევე შესაძლებელია აჭარაში მდებარე ტურისტულ საინფორმაციო ცენტრებშიც.
დასავლეთ საქართველოს რეგიონებიდან აჭარა მეღვინეობის ერთ-ერთ უძველეს კერას წარმოადგენს. აჭარის მასშტაბით მევენახეობა კი განსაკუთრებით განვითარებულია ქედის მუნიციპალიტეტში, სადაც ტურისტებს აჭარაში წარმოებული ღვინის უნიკალური სახეობების "ქედის ცოლიკაური"-ს და "ჩხავერი"-ს დაგემოვნება ტრადიციულ აჭარულ კერძებთან ერთად შეუძლიათ. ღვინის მარშრუტი საინტერესოა მასზე არსებული ისტორიულ-კულტურული ადგილებითაც. მარშრუტის შესახებ დეტალური ინფორმაციის მიღება სტუმრებს ტურისტული პროდუქტების სააგენტოს საინფორმაციო ტურისტულ ცენტრებში შეუძლიათ, რომელიც აჭარაში 10 ადგილზეა განთავსებული. მათ შორის ბათუმისა და ქობულეთის რკინიგზის სადგურებშიც.
