რუსული ავიაკომპანიები საქართველოს მიმართულებით რეისებს მოსკოვის ჟუკოვსკის სახელობის საერთაშორისო აეროპორტიდანაც განახორციელებენ. ინფორმაციას რუსული მედია უკვე ავრცელებს.
მათი ინფორმაციით, რუსულმა ავიაკომპანიებმა უკვე მიიღეს ნებართვა, რომ „ჟუკოვსკის“ აეროპორტიდან რეგულარული ფრენები განახორციელონ საქართველოს, ყაზახეთის, ჩინეთის, ტაჯიკეთის და თურქეთის მიმართულებით.
„როსაერონავიგაციის“ ინფორმაციით კი, შესაბამისი ნებართვები უკვე გააჩნია Ural Airlines-სა და Yamal Airlines-ს. თუმცა საქართველოს მიმართულებით ფრენებს ჯერჯერობით მხოლოდ Ural Airlines-ი ასრულებს და ისიც ბათუმისა და თბილისის საერთაშორისო აეროპორტში მოსკოვის დომედედოვოს საერთაშორისო აეროპორტიდან დაფრინავს.
შესაბამისად უნდა ვივარაუდოთ, რომ Ural Airlines-ი საქართველოს მიმართულებაზე „დომოდედოვოს“ „ჟუკოვსკით“ ჩაანაცვლებს.
აღსანიშნავია, რომ რუსული ავიაკომპანიები საქართველოს მიმართულებით რეისებს მოსკოვიდან დომოდედოვოს, შერემერტიევოს და ვნუკოვოს საერთაშორისო აეროპორტებიდან ასრულებენ.
საქართველოს სამოქალაქო ავიაციის სააგენტოში განმარტავენ, რომ ამ დროისათვის რომელიმე ავიაკომპანიას მოსკოვიდან აეროპორტის ცვლილებაზე არ მიუმართავს.
