თედო კობახიძის მიმართ არსებულ ბრალდებებს, თანამშრომლებისგან ფულის გამოძალვისა და მთავარ პროკურატურაში თედო კობახიძის გავლენების შესახებ, საკრებულოს თავმჯდომარისთვის დამაჯერებლობა აკლია. როგორც გიორგი ალიბეგაშვილი "კურიერთან" საუბრისას აცხადებს, „არის საეჭვო თემები, რომელიც უფრო მეტ მტკიცებულებას მოითხოვს.“ ალიბეგაშვილი ოპონენტებს გამოძიების დასრულებისთვის დალოდებას ურჩევს.
ოპოზიცია კი, თედო კობახიძისთვის უფლებამოსილების შეჩერებას ითხოვს.
„სანამ გამოძიება მიდის და სანამ გაირკვევა მართლა გამოძალვასთან, ან თანხის წაგლეჯვასთან გვაქვს საქმე, თუ ეს არის მოგონილი ბრალდება, მანამდე თედო კობახიძეს უნდა შეუჩერდეს თანამდებობრივი უფლებამოსილება. ეს არის სწორი და ნორმალური,“ - აცხადებს ალეკო ელისაშვილი.
ნაციონალური მოძრაობა კი, ქართული ოცნების მიერ კორუფციულ მმართველობის სტილზე მიუთითებს. როგორც ირაკლი აბესაძე აცხადებს, ასეთი ფაქტებით მტკიცდება, რომ ქართულ ოცნებას „საკუთარ ინტერესებზე მორგებული მმართველობა“ აქვს.
