2020 წლის ბოლომდე აჭარაში სამორინეების რაოდენობა კიდევ 10 სამორინით გაიზრდება. დღეისათვის კი რეგიონში 13 სამორინე ფუნქციონირებს.
როგორც აჭარის ფინანსთა და ეკონომიკის სამინისტროში განმარტავენ, 2015 წლისათვის მოქმედი 11 სამორინედან ბათუმის ბიუჯეტში მიღებულმა სათამაშო ბიზნესის მოსაკრებელმა 16.2 მლნ ლარი შეადგინა, რაც ბათუმის ბიუჯეტში სათამაშო ბიზნესის მოსაკრებლიდან მიღებული ჯამური შემოსავლის (20.2 მლნ ლარი) 81%-ს შეადგენს.
„ამასთან, სამორინეებიდან მიღებულ მოსაკრებლების ჯამურ მაჩვენებელში 51% შეადგინა სათამაშო მაგიდების მოსაკრებელმა, 46% - სათამაშო აპარატების მოსაკრებელმა, ხოლო დანარჩენი 3% - სხვა სახის სათამაშო ბიზნესის მოსაკრებელმა.
2015 წლისათვის სამორინეებში სათამაშო მაგიდების რაოდენობა იყო 138, (ზრდა წინა წელთან მიმართებაში - 77%), ხოლო სათამაშო აპარატების რაოდენობა - 1 064 (ზრდა წინა წელთან მიმართებაში - 115%).
გარდა ქალაქ ბათუმის მუნიციპალური ბიუჯეტისა, სათამაშო ბიზნესის მოსაკრებლის ჩარიცხვა ხდება ხელვაჩაურისა და ქობულეთის მუნიციპალურ ბიუჯეტებში. კერძოდ, 2015 წელს ხელვაჩაურის მუნიციპალურ ბიუჯეტში ჩარიცხულმა სათამაშო ბიზნესის მოსაკრებელმა შეადგინა 442.0 ათასი ლარი, ხოლო ქობულეთის მუნიციპალურ ბიუჯეტში - 52.4 ათასი ლარი“, აცხადებენ აჭარის ფინანსთა და ეკონომიკის სამინისტროში.
მათივე ინფორმაციითვე, 2015 წელს აჭარის რესპუბლიკურ ბიუჯეტში რეგიონში მოქმედი სამორინეების მიერ გადახდილმა თანხებმა 7.3 მლნ ლარი შეადგინა, რაც წინა წელთან შედარებით 57%-ითაა გაზრდილი.
სტატისტიკური ინფორმაციის მიხედვით, 2015 წელს სამორინეებში დასაქმებული იყო 2 500-მდე ადამიანი.
ასევე, 2015 წელს სამორინეებში ვიზიტორების რაოდენობამ 600 000-ზე მეტი კაცი შეადგინა, საიდანაც 78%-ს არარეზიდენტი ვიზიტორები წარმოადგენენ.
მიუხედავად იმისა, რომ 2015 წელს გაიხსნა 5 ახალი სამორინე, ვიზიტორთა რაოდენობა წინა წელთან შედარებით გაიზარდა მხოლოდ 10%-ით, რაც განპირობებულია იმ ფაქტით, რომ ახალი სამორინეების გახსნა მოხდა 2015 წლის მეორე ნახევარში.
