როგორც „ჯი-ეიჩ-ენისთვის“ სამთავრობო კულუარებიდან გახდა ცნობილი, საქართველოს თავდაცვის მინისტრის პოსტზე ოთარ დანელიას კანიდიდატურა განიხილება.
ოთარ დანელია, რომელიც ამჟამად სოფლის მეურნეობის სამინისტროს ხელმძღვანელობს, საქართველოს მთავრობაში ერთ-ერთი ყველაზე წარმატებული მინისტრია და მის სახელს დარგში მნიშვნელოვანი პროექტების განხორციელება უკავშირდება.
მას შემდეგ, რაც თინა ხიდაშელმა თავდაცვის მინისტრის პოსტიდან წასვლის შესახებ გააკეთა განცხადება, მედია სივრცეში თავდაცვის მინისტრის სავარაუდო კანდიდატებს შორის კობა კობალაძე, კახა კახიშვილი და ირაკლი სესიაშვილი დასახელდნენ.
როგორც „ჯი-ეიჩ-ენს“ სამთავრობო კულუარებთან დაახლოებულმა პირმა განუცხადა, კობალაძის კანდიუდატურა განხილვის საგანი არ გამხდარა და მის დასახელებას უფრო მედის ვარაუდებს უკავშირებენ.
„რაც შეეხება სასჯელაღსრულების მინისტრს კახა კახიშვილის, იგი ერთ-ერთ კანდიდატურად მართლაც იქნა განხილული, თუმცა კახიშვილმა თავი შეიკავა“, - განუცხადა იმავე პერსონამ „ჯი-ეიჩ-ენს“.
მისივე თქმით, რაც შეეხება სესიაშვილს, მისი კანდიდატურა დღის წესრიგიდან მას შემდეგ მოიხსნა, რაც თავდაცვის და უშიშროების კომიტეტის თავმჯდომარემ არაორაზროვანი, საჯარო განცხადებებით ბევრჯერ ჩააგდო უხერხულ მდგომარეობაში ხელისუფლება.
რაც შეეხება ოთარ დანელიას, სამთავრობო გუნდში ასევე განიხილებოდა მისი წარდგენა მაჟორიტად დეპუტატობის კანდიდატად მარტვილში, თუმცა აღნიშნულთან დაკავშირებით „ქართულ ოცნებაში“ გადაწყვეტილება არ მიღებულა.
„ჯი-ეიჩ-ენის“ წყარო აცხადებს, რომ ოთარ დანელია თავისი ეფექტური საქმიანებოთ მთავრობაში საკმაოდ მზარდ და წარმატებულ მინისტრად მიიჩნევა და „ბიოგრაფიით, ყველაზე მეტად ესადაგება თავდაცვის მინისტრის თანამდებობას და ამიტომ ამ ეტაპზე მხოლოდ მისი კანდიდატურა განიხილება“.
ოთარ დანელია 1996-2000 წლებში სწავლობდა საქართველოს დიპლომატიურ აკადემიაში. არის საერთაშორისო ურთიერთობისა და დიპლომატიის სპეციალისტი. 1997-2002 წლებში ივ. ჯავახიშვილის სახელობის სახელმწიფო უნივერსიტეტის იურიდიული ფაკულტეტის სტუდენტია. 2001-2004 წლებში საქართველოში გაეროს დამკვირვებელთა მისიის ასისტენტია. 2004-2007 წლებში „კოტ დ’ვუარში გაეროს ოპერაციების“ რეგიონალური წარმომადგენელია. 2008-2011 წლებში „ბანკი რესპუბლიკა -ჯგუფი სოსიეტე ჟენერალის“ ჯერ პროექტის მენეჯერი, შემდეგ კი პროექტებისა და ბიზნეს ანალიზის დეპარტამენტის უფროსია. 2011-2013 წლებში სს „სილქნეტის“ დირექტორთა საბჭოს წევრი და მონიტორინგისა და სტანდარტიზაციის უფროსია. 2013-2014 წლებში საქართველოს შინაგან საქმეთა სამინისტროს საფინანსო-სამეურნეო დეპარტამენტის უფროსის მოადგილე, ხოლო 2014 წლიდან საქართველოს სოფლის მეურნეობის მინისტრია.
