უზენაეს სასამართლოსთან სამოქალაქო სექტორისა და მედიაექსპერტების წარმომადგენლები შეიკრიბნენ. აქციის მონაწილეები უზენაეს და საკონსტიტუციო მოსამართლეებსა და საქართველოს პრეზიდენტს მიმართეს.
როგორც მიმართვაშია აღნიშნული „ამ დღეებში ხელისუფლებისგან დამოუკიდებელი და ერთ-ერთი ყველაზე რეიტინგული ტელეკომპანიის ბედი წყდება და მოსამართლეებმა უნდა გაიაზრონ, რომ „რუსთავი 2“-ის დაცვა არ არის რომელიმე ერთი პოლიტიკური ჯგუფის ინტერესი.“
განცხადების ავტორები მოსამართლეებს თხოვნით მიმართავენ , რომ მიუხედავად დიდი წნეხისა, მათ მხედველობაში მიიღონ, რომ მათ გადაწყვეტილებაზეა დამოკიდებული 2016 წლის საპარლამენტო არჩევნების ლეგიტიმაციის საკითხი.
„მივმართავთ საქართველოს პრეზიდენტს და შევახსენებთ, რომ პოლიტიკური პასუხისმგებლობა უზენაესი სასამართლოს მოქმდებებზე მასაც ეკისრება - მოსამართლეები მისი რჩეულები არიან“,- ნათქვამია განცხადებაში.
მიმართვაში ასევე აღნიშნულია, რომ „რუსთავი 2“ -ის სასამართლო პროცესს ძნელია სამართლიანი უწოდო.
„კარგად გვესმის, რომ ივანიშვილს და მის გუნდს აფრთხობს „რუსთავი 2“-ის მიერ 8 ოქტომბერს დაგგემილი ეგზიტპოლები და მისი როლი ამომრჩეველთა ხმების დაცვის საქმეში და ამიტომ მიდის ასეთ რისკზე. ჩვენ არ ვაპირებთ ხელისუფლებას მივცეთ შესაძლებლობა წაგვართვას ხმა, რომელიც „რუსთავი 2“-დან მოდის. ჩვენ ფიზიკურად დავიცავთ „რუსთავი 2“-ს ხელისუფლების ძალადობისგან და არ დავუშვებთ უკანონო გადაწყვეტილების აღსრულებას“,- ნათქვამია განცხადებაში.
