27 ივნისს ქალაქ ბერნში ხელი მოეწერება შეთანხმებას საქართველოსა და ევროპის თავისუფალი ვაჭრობის ასოციაციას (EFTA) შორის თავისუფალი ვაჭრობის შესახებ.
EFTA-სთან თავისუფალი ვაჭრობის შეთანხმების გაფორმების შედეგად, საქართველოში წარმოებული საქონლისა და მომსახურებისთვის მაღალმსყიდველუნარიანი ბაზარი გაიხსნება. EFTA ოთხ ქვეყანას (შვეიცარია, ისლანდია, ნორვეგია და ლიხტენშტეინი) და 13 მილიონზე მეტ მომხმარებელს აერთიანებს.
საქონლისა და მომსახურების თავისუფალი გადაადგილება ხელს შეუწყობს საქართველოს საექსპორტო და საინვესტიციო პოტენციალის ზრდას, ასევე ახალი საწარმოებისა და სამუშაო ადგილების გაჩენას. აღსანიშნავია, რომ ეს იქნება ვაჭრობის სფეროში პირველი საერთაშორისო შეთანხმება, რომელსაც საქართველო ისლანდიასთან, ნორვეგიასა და ლიხტენშტეინთან გააფორმებს.
