პირველი ვიცე-პრემიერი, ეკონომიკისა და მდგრადი განვითარების მინისტრი მიიჩნევს, რომ დარიალის ხეობაში გზის აღდგენას დაახლოებით 2 კვირამდე დასჭირდება. დიმიტრი ქუმსიშვილმა განაცხადა ასევე, რომ სახელმწიფო ბიუჯეტში სტიქიის ლიკვიდაციისთვის საჭირო თანხები გათვალისწინებულია.
,,ჩვენ სახელმწიფო ბიუჯეტში სტიქიის ლიკვიდაციისთვის საჭირო თანხები გათვალისწინებული გვაქვს. გუშინ ღამიის ინფორმაციით, რაც მაქვს, ჩვენ დაგვჭირდება სადღაც 10 დღე, 2 კვირა იმისთვის, რომ ის ჩაწყვეტილი გზა აღვადგინოთ", - განაცხდა ქუმსიშვილმა.
მცხეთა–სტეფანწმინდა–ლარსის საავტომობილო გზის ამალი-დევდორაკის ხეობაში სტიქიური პროცესების გააქტიურების გამო, 134-კმ - 135კმ მონაკვეთზე, საშიშ ზონაში, ყველა სახის ავტოტრანსპორტის მოძრაობა აკრძალულია. დევდორაკის მყინვარის ძირში დაახლოებით ერთი კილომეტრის ტერიტორიაზე გზა ადიდებულმა თერგმა წაიღო. ღვარცოფის გამო, მუშაობა შეაჩერა სასაზღვრო გამშვებმა პუნქტმა ყაზბეგმა, რის შედეგადაც დარიალის ხეობაში, რუსეთის ტრიტორიისკენ მიმავალი მანქანების დიდი კოლონა გზის გაგრძელება ვეღარ ახერხებს. ისინი დარიალის ხეობაში არიან ჩარჩენილები. მგზავრებს ლარსის მეშვეობით, რუსეთის ტერიტორიაზე გადასვლა სურდათ.
