მნიშვნელოვანია ფინანსების მოზიდვა, იმისათვის რათა გარემოს მდგომარეობა გაუმჯობესდეს და შესაბამისად გაუმჯობესდეს ჩვენი ცხოვრების ხარისხი, აღნიშნულის შესახებ განცხადება ეკონომიკისა და მდგრადი განვითარების მინისტრმა დიმიტრი ქუმსიშვილმა ბათუმში მიმდინარე „გარემო ევროპისათვის“ მე-8 გარემოსდაცვით მინისტერიალს მსვლელობისას გააკეთა.
როგორც ქუმსიშვილმა განაცხადა მსგავსი ღონიშზიებების ჩატარება ქვეყანაში მნიშვნელოვანია.
„დღეს, საქართველო მასპინძლობს „გარემო ევროპისათვის“ მერვე მინისტერიალს. ძალიან მნიშვნელოვანია აღნიშნული ღონისძიების საქართველოში ჩატარება. 56 ქვეყნის 600-მდე დელეგატი ესწრება ღონისძიებას და მასზე იხილება ისეთი მნიშვნელოვანი საკითხები როგორიცაა: მწვანე ეკონომიკის განვითარება, მდგრადი ეკონომიკის განვითარება, ასევე გარემოს დაცვა.
ეს ყველაფერი კი პირდაპირ აისახება ჩვენი ქვეყნების, ჩვენი მოსახლეობის კეთილდღეობაზე. საკითხები, რომელიც დღეს იქნება განხილული მინისტერიალის მსვლელობისას, ძალიან მნიშვნელოვანია რადგანაც ეს ყველაფერი უნდა აისახოს იმ სტრატეგიებში, რომელიც ჩვენს ქვეყანას გააჩნია და იმ სამოქმედო გეგმებში რაც ყველა ჩვენთაგანის კეთილდღდეობაზე პოვებს გავლენას. აქვე მინდა ავღნიშნო, რომ მნიშვნელოვანია ის მხარდაჭერა, რომელიც ჩვენ გვაქვს როგორც ევროპიდან ასევე ოისიდის ქვეყნებიდან. და ძალიან მნიშვნელოვანია იმ ფინანსების მოზიდვა, რომელიც არის შესაძლებელი რომ მოვიზიდოთ, იმისათვის რათა გარემოს მდგომარეობა გაუმჯობესდეს და შესაბამისად გაუმჯობესდეს ჩვენი ცხოვრების ხარისხი“, აღნიშნა დიმიტრი ქუმსიშვილმა.
საქართველო გაეროს ევროპის ეკონომიკური კომისიის (UNECE) „გარემო ევროპისათვის“ მე-8 გარემოსდაცვით მინისტერიალს მასპინძლობს. მინისტრთა კონფერენცია - „ბათუმი 2016“ სასტუმრო „შერატონ ბათუმში“ გარემოსა და ბუნებრივი რესურსების დაცვის სამინისტროს ორგანიზებით გაიმართა.
ბათუმის მინისტერიალის ფარგლებში საქართველომ 56 ქვეყნის 600-მდე ოფიციალურ დელეგატს გარემოს დაცვისა და განათლების საკითხებზე პასუხისმგებელი მინისტრების, ბიზნეს სექტორის, ბიზნეს ასოციაციებისა და 55 საერთაშორისო ორგანიზაციის მაღალი დონის წარმომადგენლებს უმასპინძლა.
კონფერენციის მონაწილეებს სიტყვით საქართველოს პრემიერ-მინისტრმა გიორგი კვრიკაშვილმა, გარემოსა და ბუნებრივი რესურსების დაცვის მინისტრმა გიგლა აგულაშვილმა, აჭარის მთავრობის თავმჯდომარემ არჩილ ხაბაძემ და გაეროს ევროპის ეკონომიკური კომისიის აღმასრულებელმა მდივანმა კრისტიან ბახმა მიმართეს.
"გარემო ევროპისათვის" პროცესი წარმოადგენს გაეროს ევროპის ეკონომიკური კომისიის რეგიონის წევრი ქვეყნების, გაეროს სისტემაში არსებული ორგანიზაციების, მთავრობათაშორისი ორგანიზაციების, რეგიონული გარემოსდაცვითი ცენტრების, არასამთავრობო ორგანიზაციების, კერძო სექტორის და სხვა დაინტერესებული ჯგუფების თანამშრომლობის განსაკუთრებულ ფორმატს. აღნიშნული პროცესი და მისი ეგიდით გამართული მინისტრთა კონფერენციები 3-5 წელიწადში ერთხელ იმართება. ეს არის მაღალი დონის პლატფორმა, რომელიც უზრუნველყოფს დაინტერესებული მხარეებისთვის რეგიონის 56 ქვეყნის გარემოსდაცვითი საკითხების განხილვას, პრიორიტეტული მიმართულებების განსაზღვრასა და ერთობლივი ღონისძიებების დაგეგმვას მდგრადი განვითარების მიზნით.
კონფერენციის ძირითადი თემებია „მწვანე ეკონომიკის განვითარება პან-ევროპულ რეგიონში“ და „ჰაერის ხარისხის გაუმჯობესება უკეთესი გარემოსა და ადამიანის ჯანმრთელობისთვის“. ამასთან, კონფერენციის ფარგლებში, მაღალი დონის შეხვედრა გაიმართება თემაზე: „განათლება მდგრადი განვითარებისთვის“.
პირველად “გარემო ევროპისთვის“ მინისტერიალი 1991 წელს, ჩეხოსლოვაკიის გარემოს დაცვის სამინისტროს ინიცირებით, ქ. დობრისში ჩატარდა. ამ დროისთვის სულ 7 კონფერენცია გაიმართა. ჩეხეთის გარდა შეხვედრები გაიმართა შვეიცარიაში (ლუცერნი, 1993), ბულგარეთში (სოფია, 1995), დანიაში (ორჰუსი, 1998), უკრაინაში (კიევი, 2003), სერბეთსა (ბელგრადი, 2007) და ყაზახეთში (ასტანა, 2011).
