„ლუდის ბრენდი“ International Spirit Award-ზე ოქროს მედლის მფლობელი გახდა. კომპანია "მაისტერბრაუს“ მიერ წარმოებულმა სპირტიანმა სასმელმა „ლუდის ბრენდმა“ (40% ALC შემცველობით), სპირტიანი სასმელების საერთაშორისო დაჯილდოებაზე ოქროს მედლი მოიპოვა.
"მაისტერბრაუს" „ლუდის ბრენდი“ ვისკების კატეგორიაში მოხვდა, სადაც კონკურენცია გაუწია საქვეყნოდ ცნობილ ვისკის ბრენდებს შოტლანდიიდან, ირლანდიიდან, ინგლისიდან, გერმანიიდან, ამერიკიდან, ფინეთიდან, იაპონიიდან და სხვა.
"მაისტერბრაუში“ განმარტავენ, რომ მსოფლიოს სხვადასხვა ქვეყნებიდან მოწვეულმა 50 კაციანმა ჟიურიმ ერთხმად მოიწონა მაისტერბრაუს "ლუდის ბრენდი" და მიუჩინა ადგილი ისეთი ცნობილი ვისკების გვერდით როგორებიცაა: Johnnie Wallker Black Label, Talisker Skye Single Malt Scotch Whisky, Oban Little Bay და ა.შ.
ტრადიციული, მე-13 საერთაშორისო დაჯილდოებაზე, რომელიც 2016 წლის აპრილში, გერმანიაში ჩატარდა, 29 ქვეყნის 800-ზე მეტი სპირტიანი სასმელი იყო წარმოდგენილი.
International Spirit Award-ი, რომელიც "მაინინგერის" გამომცემლობის ეგიდით ტარდება, მსოფლიოში ერთ-ერთ უმნიშვნელოვანეს და პრესტიჟულ კონკურსად ითვლება.
აღსანიშნავია, რომ კომპანია „მაისტერბრაუ" ბაზარზე 2014 წლიდან გამოჩნდა და დღეს ლუდისა და ალკოჰოლური სასმელების წარმოებითაა დაკავებული.
"მაისტერბრაუმ" თავის დროზე ფუნქციონირება საუკეთესო გერმანული ხარისხის გაუფილტრავი ჩამოსასხმელი ლუდის წარმოებით დაიწყო, ხოლო 2015 წლიდან ლუდის პარალელურად სპირტიანი სასმელი - "ლუდის ბრენდი" გამოუშვა.
კომპანიის მენეჯმენტი აცხადებს, რომ საერთაშორისო აღიარების შემდეგ "ლუდის ბრენდზე" მოთხოვნა იზრდება.
„მიღებული ჯილდოს შემდგომ ჩვენს "ლუდის ბრენდზე" გაჩნდა გარკვეული დაინტერესება გერმანიის სხვადასხვა ფირმებიდან და პირველად, 27 მაისს საცდელი პარტია (864 ბოთლი) ექსპორტზე გერმანიაში გავაგზავნეთ.
ასევე გეგმაში გვაქვს პროდუქციის ასორტიმენტის გაზრდა, სხვადასხვა ქართული ხილის ნატურალური ალკოჰოლური სამელების გამოშვება. ძირითადი აქცენტი გვაქვს აღებული უნიკალურ და იშვიათი სასმელების წარმოებაზე. შესაბამისად, კვლავ ვაპირებთ საერთაშორისო კონკურსებში და გამოფენებში მონაწილეობას ცნობადობის და პოპულარობის გაზრდისთვის“, აცხადებენ „მაისტერბრაუში".
„მაისტერბრაუს" საწარმო თანამედროვე ტექნოლოგიებითაა აჭღურვილი.
„ჩვენ თავის დროზე ტექნიკა გერმანიიდან ჩამოვიტანეთ. რაც შეეხება ტექნოლოგიებს, ჩვენს გერმანელ მეგობარ ტექნოლოგთან თანამშრომლობით ოსტატურად ვუხამებთ ერთმანეთს საერთაშორისო და ადგილობრივ ტექნოლოგიებს, ასევე გახსნილი ვართ ნებისმიერი ინოვაციების და ექსპერიმენტების მიმართ“, აცხადებენ „მაისტერბრაუში“.
