ჩემი პოზიციაა, რომ ზედამხედველობის სამსახური უნდა დარჩეს ეროვნულ ბანკში, - ამის შესახებ ეკონომიკისა და მდგრადი განვითარების მინისტრმა დიმიტრი ქუმსიშვილმა განაცხადა. მისივე თქმით, მას ეს პოზიცია ადრეც დაუფიქსირებია.
„ეს არის ჩემი პოზიცია, ჩემი დამოკიდებულება. ეს პოზიცია მე არც ადრე დამიმალავს. დღეს ეს საკითხი იხილება სკაონსტიტუციო სასამართლოში, თუმცა მე მაქვს ჩემი დამოკიდებულება და ჩემი პოზიცია, რომ ზედამხედველობის სამსახური უნდა დარჩეს ეროვნულ ბანკში" - განაცხადა ქუმსიშვილმა.
„საქართველოს ეროვნული ბანკის“ შესახებ კანონპროექტი, რომელიც ეროვნული ბანკის შემადგენლობიდან საბანკო სფეროს ზედამხედველობის სამსახურის გამოყოფას ითვალისწინებს, ძალაში გასული წლის ოქტომბერში შევიდა. „საქართველოს ეროვნული ბანკის“ შესახებ და მასთან დართულ 13 კანონპროექტს პრეზიდენტმა ხელი მოაწერა. თუმცა, ოპოზიციამ ცვლილებები არაკონსტიტუციურად მიიჩნია და საკონსტიტუციო სასამართლოში სარჩელი შეიტანა.
