საქართველოს საპატრიარქოში ხვალ, 25 მაისს, წმინდა სინოდის სხდომა გაიმართება. საპატრიარქოს ინფორმაციით, სხდომა 11:00 საათზე დაიწყება და ძირითადი განსახილველი საკითხი საბერძნეთში, კრეტაზე გასამართი მართლმადიდებელთა მსოფლიო კრებისთვის მზადება იქნება.
სხდომის ოქმი დღის მეორე ნახევარში გამოქვეყნდება.
მართლმადიდებელი ეკლესიების წმინდა და დიდი კრება კუნძულ კრეტაზე 16-27 ივნისს უნდა გაიმართოს. კრების დღის წესრიგის შესათანხმებლად ჟენევაში, (შამბეზში) 22-27 იანვარს მართლმადიდებელ ეკლესიათა მეთაურების შეხვედრა ჩატარდა. საქართველოს საპატრიარქოში აცხადებდნენ, რომ შეხვედრის შემდეგ წმინდა და დიდ კრებაზე გასატანი ყველა დოკუმენტი გასაჯაროვდებოდა.
”დოკუმენტების ნაწილი უკვე აიტვირთა საპატრიარქოს ვებ-გვერდზე, რასაც კიდევ ორი დოკუმენტი დაემატება. დოკუმენტები შეგიძლიათ იხილოთ ბმულზე: http://patriarchate.ge/wminda-da-didi-kreba/", - აცხადებენ საპატრიარქოში.
