25 მაისს სასტუმრო „თბილისი მარიოტში“ საერთაშორისო სემინარი „საჯარო და კერძო თანამშრომლობის (Public Private Partnership - PPP) სამართლებრივი ჩარჩოს განვითარება, საერთაშორისო სტანდარტები და საუკეთესო პრაქტიკა“ გაიმართება. სემინარი საქართველოს ეკონომიკისა და მდგრადი განვითარების სამინისტროსა და ევროპის რეკონსტრუქციისა და განვითარების ბანკის (EBRD) თანამშრომლობითა და ორგანიზებით ჩატარდება.
სემინარს გახსნის ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი.
სემინარის მუშაობაში მონაწილეობას მიიღებენ რეგიონის ქვეყნების, საქართველოში მოქმედი საერთაშორისო ორგანიზაციებისა და საქართველოს საჯარო სექტორის წარმომადგენლები.
სემინარზე განხილული იქნება საჯარო და კერძო თანამშრომლობის (Public Private Partnership - PPP) სამართლებრივი ჩარჩო და კანონმდებლობის განვითარების პერსპექტივები, ასევე მოხდება საუკეთესო გამოცდილების გაზიარება და გაიმართება დისკუსია PPP-კანონმდებლობასთან დაკავშირებულ საკითხებზე.
საქართველოში საჯარო და კერძო თანამშრომლობის (PPP) მარეგულირებელი სამართლებრივი ბაზის განვითარებისთვის ტექნიკური დახმარება ევროპის რეკონსტრუქციისა და განვითარების ბანკმა საქართველოს ეკონომიკისა და მდგრადი განვითარების სამინისტროსთან თანამშრომლობის შედეგად გამოყო.
აღნიშნული ტექნიკური დახმარების ფარგლებში დაფინანსებული პროექტი 2015 წლის ივლისის ბოლოს დაიწყო.
მოცემულ ეტაპზე პროექტის ფარგლებში შერჩეული კონსულტანტების მიერ უკვე შემუშავდა საქართველოში საჯარო და კერძო თანამშრომლობის პოლიტიკის დოკუმენტი, რომელიც საქართველოს მთავრობაშია წარდგენილი განსახილველად. ამჟამად მიმდინარეობს მუშაობა შესაბამისი საკნანონმდებლო აქტების პროექტებზე.
