კახეთში სეტყვის საწინააღმდეგო სისტემა ამოქმედდა. მართვის ცენტრმა დღეს დილას თელავის რაიონის სოფლებში სეტყვასაშიში ღრუბლების დასაშლელად სროლები განახორციელა.
როგორც ,,დელტას“ საზოგადოებასთან ურთიერთობის სამსახურის უფროსი თამარ გვარიშვილი აცხადებს, სეტყვის საწინააღმდეგო ყველა დანადგარი სრულად არის აღჭურვილი და გარკვეული რაოდენობა უკვე ამუშავდა.
მისივე თქით, დღეს თელავში 50-მდე რაკეტა გაისროლეს, რის შედეგადაც კონკრეტული ზონების დამუშავება მოხერხდა და სეტყვა წვიმად წამოვიდა.
მაისში, სხვადასხვა დროს, კახეთის რამდენიმე რაიონის ათზე მეტი სოფელი სეტყვამ მნიშვნელოვნად დააზარალა.
სეტყვის საწინააღმდეგო სისტემის შექმნაზე 2014-2015 წლებში ბიუჯეტიდან დაახლოებით 20 მილიონი ლარი დაიხარჯა. სისტემის მართვის ცენტრი თბილისშია ბაზირებული, კახეთში კი 86 საცეცხლე წერტილია განთავსებული.
რამდენიმე დღის წინ თავდაცვის მინისტრმა თინა ხიდაშელმა ,,დელტას” ხელმძღვანელი უჩა ძოძუაშვილი თანამდებობიდან მოხსნა. მიზეზად კახეთში სეტყვის საწინააღმდეგო სისტემის არაეფექტურობა დასახელდა. მოგვიანებით, თავდაცვის მინისტრმა, მოკვლევის შემდეგ, ,,დელტას“ ხელმძღვანელის თანამდებობაზე დაბრუნება არ გამორიცხა.
უჩა ძოძუაშვილს გუშინ, პარლამენტის თავდაცვისა და უშიშროების კომიტეტის დახურულ სხდომაზე მოუსმინეს. მისი თქმით, ,,დელტას“ ბრალეულობა არის აბსოლუტურად ნულოვანი და სეტყვის საწინააღმდეგო რაკეტების მარაგი უნდა ყოფილიყო ჯერ კიდევ წინა წელს.
,,დელტას ბრალეულობა აქ არის აბსოლუტურად ნულოვანი. ამას ამტკიცებს ჩვენი საქმე, ამას ამტკიცებს ის უამრავი რაოდენობის დოკუმენტი, რომელიც ჩვენ გაგვაჩნია და დღეს დღეისობით, ჩვენ ვაგრძელებთ მუშაობას. ჩვენ წინასწარ უნდა გვქონოდა მარაგი რაკეტების, ეს მარაგი უნდა გვქონოდა ჯერ კიდევ წინა წელს. არ შემიძლია ამაზე კომენტარი გავაკეთო ანუ თუ ვისი ბრალეულობით მოხდა ეს. ცალსახად რაც შემიძლია ვთქვათ, რომ როდესაც ,,დელტას” ეძლევა შესაძლებლობა იმუშაოს, ,,დელტა” მუშაობს ყოველთვის“ - აღნიშნა უჩა ძოძუაშვილმა.
