სოფლის მეურნეობის მინისტრი ოთარ დანელია სურსა
თის ეროვნული სააგენტოს ხელმძღვანელ პირებთან ერთად მეცხვარეობის დარგის წარმომადგენლებს შეხვდა.
სამინისტროში გამართულ შეხვედრაზე მეცხვარეობის განვითარებისთვის განხორციელებულ და დაგეგმილ ღონისძიებებზე იმსჯელეს. აღინიშნა, რომ ცხოველთა ჯანმრთელობის დაცვისა და ქვეყანაში ეპიზოოტიური კეთილსაიმედოობის შენარჩუნების მიზნით, საქართველოს ყველა რეგიონში მიმდინარეობს ცხოველების სავალდებულო ვაქცინაცია ისეთ დაავდებებზე, როგორცაა ცხვრისა და თხის ყვავილი, წვრილფეხა პირუტყვის ჭირი, თურქული დაჯილეხი.
სოფლის მეურნეობის სამინისტროს სურსათის ეროვნული სააგენტოს მიერ დაგეგმილი და ოპერატიულად გატარებული ღონისძიებების შედეგად თავიდან იქნა აცილებული წვრილფეხა პირუტყვის ჭირის გავრცელება, რომელიც აღმოსავლეთ საქართველოში მიმდინარე წლის დასაწყისში დაფიქსირდა. უახლესი მონაცემებით, მილიონ 400 ათასი სული პირუტყვია ვაქცინირებული.
2015 წლის ნოემბრიდან მიმდინარეობს წვრილფეხა პირუტყვის იდენტიფიკაცია-რეგისტრაციის პროგრამა, რომლის ფარგლებშიც 100 ათასამდე ცხოველია იდენტიფიცირებული. წლის ბოლომდე 700 ათასი პირუტყვის იდენტიფიკაციაა დაგეგმილი, რაც ცხოველის მიკვლევადობას და ექსპორტის წახალისებას შეუწყობს ხელს.
2015 წელს ცხოველთა გადასარეკ ტრასებზე მოეწყო 2 ბიოუსაფრთხოების პუნქტი. ქვეყნის მასშტაბით დაგეგმილია 8 ასეთი პუნქტის აშენება. გადასარეკ ტრასებზე ბიოუსაფრთხოების პუნქტების მოწყობა ცხოველების ჯანმრთელობის დაცვას და დაავადებების გავრცელების შემცირებას შეუწყობს ხელს.
„მეცხვარეობის დარგის განვითარება ერთ-ერთი პრიორიტეტული მიმართულებაა. ამ მიზნით, სოფლის მეურნეობის სამინისტრო აქტიურად თანამშრომლობს დარგის წარმომადგენლებთან. ცხოველთა ჯანმრთელობის შენარჩუნებისთვის სახელმწიფოს მიერ გატარებულმა ღონისძიებებმა ხელი შეუწყო საქართველოს, როგორც კეთილსაიმედო ქვეყნის იმიჯის დამკვიდრებას და საექსპორტო პოტენციალის ზრდას. აღსანიშნავია, რომ გაფართოვდა ექსპორტის გეოგრაფიული არეალიც,“ - აღნიშნა ოთარ დანელიამ.
მიმდინარე წელს 28 500 სული ცხვრის ექსპორტი განხორციელდა არაბეთში, საუდის არაბეთსა და კატარში. აღსანიშნავია, რომ ქართული ცოცხალი ცხოველების ექსპორტი ეგვიპტეში პირველად განხორციელდა. ქართული ცხვრით დაინტერესდა ბაჰრეინის სამეფოც. ამჟამად მიმდინარეობს მოლაპარკებების პროცესი.
მეცხვარეებთან შეხვედრა კითხვა-პასუხის რეჟიმში წარიმართა და აღინიშნა, რომ თანამშრომლობა და მხარეებს შორის აქტიური კომუნიკაცია მომავალშიც გაგრძელდება.
#სოფლისმეურნეობა2016 #სურსათისუვნებლობა2016 #ოთარდანელია
