პრეზიდენტის სარეზერვო ფონდის დაფინანსებით, პანკისის ხეობის სოფელ ბირკიანში ნებისმიერ მსურველს შეუძლია მეფუტკრეობის შემსწავლელი კურსები გაიაროს.
პრეზიდენტის ადმინისტრაციის უფროსი გიორგი აბაშიშვილი, პრეზიდენტის მრჩეველი ეთნიკური უმცირესობების საკითხებში სოფიო შამანიდი და პრეზიდენტის ადმინისტრაციის სამდივნოს უფროსი გიორგი ჟურული სოფელ ბირკიანში მეფუტკრეობის შემსწავლელ კურსში ჩართულ მოსახლეობას შეხვდნენ და დაინტერესდნენ, იძლევა თუ არა სასწავლო პროგრამის მოცულობა იმის საშუალებას, რომ მათ კურსის დასრულების შემდეგ მეფუტკრეობა მცირე ბიზნესად აქციონ და ამით საკუთარი ოჯახების სოციალური მდგომარეობა გააუმჯობესონ. მეფუტკრეობის შემსწავლელ კურსი პრაქტიკულ და თეორიულ კურსს მოიცავს, მასში ჩართული მოსახლეობა სწავლობს, როგორც სკების გაკეთებას ასევე ფუტკრის მოვლას.
ცენტრში დასაქმებულია 2 ადამიანი, რომელთა დახმარებით, დაინტერესებულ პირებს შეუძლიათ სკების დამზადება ისწავლონ, რის შემდეგაც მათ საშუალება ეძლევათ ეკონომიკის სამინისტროს მიმართონ, მცირე მეწარმეობის განვითარების პროექტის ფარგლებში დაფინანსება მოიპოვონ და მეფუტკრეობის შემსწავლელი კურსებიდან მიღებული ცოდნა მომავალ საქმიანობად აქციონ.
პრეზიდენტის ადმინისტრაციის წარმომადგენლები აღნიშნული ცენტრის ფუნქიონირებას გაეცნენ და განაცხადეს, რომ სარეზერვო ფონდის დახმარებით უკვე შეძენილია მეფუტკრეობის საქმიანობის განვითარებისთვის აუცილებელი ყველა სახის ინვენტარი და ხელსაწყო.
