დღეიდან მარნეულის მოსახლეობას საშუალება ექნება ახალი, უნივერსალური საფოსტო მომსახურებით ისარგებლოს - მარნულში „საქართველოს ფოსტის“ რიგით მე-15 განახლებული სერვისცენტრი გაიხსნა. ღონისძიებას საქართველოს ეკონომიკისა და მდგრადი განვითარების მინისტრის მოადგილე დავით ხუციშვილი, „საქართველოს ფოსტის“ ხელმძღვანელი ლევან ჩიკვაიძე და ადგილობრივი ხელისუფლების წარმომადგენლები დაესწრნენ.
„საქართველოს ფოსტამ“ მომხმარებლისთვის მაქსიმალური კომფორტის შექმნა უზრუნველყო - სერვისცენტრები თანამედროვე ავეჯით და ტექნიკით აღიჭურვა. განახლებული და ავტომატიზირებული ცენტრები მნიშვნელოვნად გაზრდის მომსახურების ხარისხს.
პროფესიონალებით დაკომპლექტებულ განახლებულ სერვისცენტრებში მომხმარებელს მომსახურების ახალ სტანდარტს და ახალ პროდუქტებს შეთავაზებენ.
როგორც „საქართველოს ფოსტაში“ აცხადებენ, კომპანიის მიზანია გახდეს ლიდერი ბრენდი საფოსტო გზავნილებში როგორც ქვეყნის შიგნით, ასევე მის ფარგლებს გარეთ.
ახალ სერვისცენტრში 12 ადგილობრივი მაცხოვრებელი დასაქმდება. სულ „საქართველოს ფოსტაში“ დასაქმებული ადამიანების რაოდენობა 2673 შეადგენს და ის ერთ-ერთი ყველაზე დიდი დამსაქმებელი კომპანიაა საქართველოში.
