ვარშავის სამიტთან დაკავშირებით გარკვეული პროგნოზების გაკეთება ნაადრევია, რადგან საერთაშორისო ურთიერთობები დინამიური პროცესია და დადებითი თუ უარყოფითი სიურპრიზები არ უნდა გამოვრიცხოთ, - ამის შესახებ საქართველოს უსაფრთხოებისა და განვითარების ცენტრის დირექტორმა, ლევან დოლიძემ გადაცემა 2030-ში სტუმრობისას განაცხადა.
“დღევანდელი გეოპოლიტიკური რეალობიდან გამომდინარე, რისი მიღების შანსიც არსებობს, ეს არის პრაქტიკული სარგებლის მიღება, რათა კიდევ უფრო მეტად გავაძლიეროთ თავდაცვისუნარიანობა, გავაუმჯობესოთ უსაფრთხოების გარემო და მოვახერხოთ საქართველოს NATO-ში გაწევრიანების პროცესის შეუქცევადობის დემონსტრირება”, - განაცხადა ლევან დოლიძემ.
მისი თქმით, სპეკულაციები, თითქოს, ჩვენ ოკუპირებულ ტერიტორიებზე უარის თქმის გარეშე NATO-ში გაწევრიანებას ვერ მოვახერხებთ, უპასუხისმგებლო და უასაფუძვლოა.
“NATO-ს წესდებაში არ არსებობს ჩანაწერი, რომ ქვეყანა, რომელსაც ტერიტორიული პრობლემები აქვს, NATO-ს წევრობას ვერ მიაღწევს”, - განაცხადა ლევან დოლიძემ.
მან ასევე აღნიშნა, რომ სტრატეგიულ პარტნიორთან ერთად სამხედრო წვრთნების ჩატარება ჩვენი სუვერენული უფლებაა და ამ უფლების კითხვის ნიშნის ქვეშ დაყენება ერთ-ერთი ყველაზე დიდი პროვოკაციაა.
“არ ვფიქრობ, რომ ასეთი ტიპის დისკურსი რუსეთთან ურთიერთობების დარეგულირებას ხელს შეუწყობს და შესაძლებელს გახდის იმ საფრთხეების განეიტრალებას, რაც შეიძლება, რუსეთიდან მოდიოდეს”, - განაცხადა ლევან დოლიძემ.
