საქართველო, როგორც კინოგადაღების მოედანი დღითიდღე უფრო აქტუალური ხდება. სვანეთში, 22 აპრილიდან 4 მაისის ჩათვლით კიდევ ერთი უცხოური ფილმის გადაღებები მიმდინარეობდა.
ინდურმა გადამღებმა სტუდიამ “Mad Studio” ფილმის „დედა“ გადასაღებად სცენარის გათვალისწინებით სვანეთი შეარჩია. სვანეთის უნიკალური ბუნებისა და ზაფხულის სეზონზე თოვლიანი ამინდის გამო სწორედ საქართველო გახდა დანიშნულების ადგილი.
ფილმის მთავარი პროდიუსერები ინდური კინოინდუსტრიის წამყვანი ფიგურები Boney Kapoor და Sunil Manchanda არიან. ამასთანავე, ფილმში მთავარ როლს Sridevi Kapoor ასრულებს, რომელიც ინდოეთის მასშტაბით ცნობილი და გავლენიანი მსახიობია. მას პარტნიორობას უწევენ ასევე პოპულარული მსახიობები: Abhimanyu Singh, Akshaye Khanna და Adnan Siddiqui, რაც, ცხადია, მნიშვნელოვანია ინდურ ბაზარზე საქართველოს, როგორც კინოგადაღების ცენტრის პოპულარიზაციის კუთხით და ხელს უწყობს ქართული კინოინდუსტრიის განვითარებას.
ფილმის ე.წ პროდაქშენზე ქართულმა კომპანიამ Film Factory იზრუნა, ქართულმა მხარემ ინდოელ პარტნიორებს ყველა სამუშაო პირობა შეუქმნა, როგორც კვალიფიციური კადრების, ასევე აპარატურისა და პროცესების მენეჯმენტის კუთხით.
უნდა აღინიშნოს, რომ სახელმწიფო პროგრამას „აწარმოე საქართველოში“ ახალი, კინოინდუსტრიის წახალისების კომპონენტი „გადაიღე საქართველოში“ დაემატა, რომელიც კინოწარმოებით დაინტერესებულ ადგილობრივ თუ საერთაშორისო პროდიუსერებს შესაძლებლობას აძლევს საქართველოში გადაიღონ ფილმი თუ სხვა სახის აუდიო/ვიზუალური პროდუქცია და კვალიფიციური ხარჯების 20-25%-მდე უკან დაიბრუნონ. პროგრამის საერთაშორისო მასშტაბით პოპულარიზაციის კუთხით კი აქცენტი კეთდება ინდოეთისა და ამერიკის ბაზრებზე.
ე.წ Road Show-ების გამართვის გზით, პროგრამის შესახებ ინფორმაციის ამომწურავად გაცნობა, მხარეებისათვის გადასაღები ლოკაციების შეთავაზება და კინოწარმოებასთან დაკავშირებით ქვეყნის პოტენციალის სრულად წარმოჩენაა დაგეგმილი. სწორედ ხსენებულის ფარგლებში ქალაქ მუმბაიში საქართველოს ეკონომიკისა და მდგრადი განვითარების მინისტრის მოადგილის, ქეთევან ბოჭორიშვილისა და პროგრამის განმახორციელებელი უწყების, საქართველოს ეკონომიკისა და მდგრადი განვითარების მეწარმეობის განვითარების სააგენტოს წარმომადგენლის პროდუქტიული ვიზიტი შედგა და საქართველოთი ინდური მხარის დაინტერესება გამოიწვია.
