ყაზახ ტურისტებს საქართველოში ღვინითა და ცეკვით დახვდებიან, - აღნიშნულის შესახებ განცხადება ყაზახეთში საქართველოს საგანგებო და სრულუფლებიანმა ელჩმა ზურაბ პატარიძემ ასტანაში მიმდინარე „აჭარის დღეების“ ფარგლებში გააკეთა.
„საქართველო ყაზახეთისთვის უვიზო ქვეყანაა. წელიწადის 365 დღეს, ნებისმერ დროს, ყაზახეთის მოქალაქეები ჩამოდიან საქართველოში. ყოველ ყაზახ ტურისტს აეროპორტში ჩვენ ღვინითა და ცეცხლოვანი ცეკვებით ვხვდებით. ამის გარდა აეროპორტში არის სერვის-ცენტრი, სადაც დაინტერესებულ პირს ეტყვიან და განუმარტავენ, თუ რომელ სასტუმროში დაბინავდეს, სად წავიდეს და ასე შემდეგ“, განაცხადა პატარიძემ.
მისი განმარტებით, ტურისტებისათვის ასეთი დამოკიდებულება პირველ რიგში სტუმრებისადმი პატივისცემისა და სითბოს გამოხატვაა.
"ჩვენ გვსურს წარმოვაჩინოთ, რომ საქართველოში არამხოლოდ სტუმართმოყვარე, არამედ გულუხვი ადამიანები არიან“, აღნიშნა პატარიძემ.
მან ასევე განმარტა, რომ ქვეყანაში მნიშვნელოვანი ყურადღება ეთმობა ტურისტების უსაფრთხოების საკითხებს.
ელჩი იმედოვნებს, რომ მიმდინარე წელს საქართველოში ყაზახეთიდან ტურისტების რაოდენობა მინიმუმ 50 %-ით გაიზრდება.
