საქართველოს ეკონომიკისა და მდგრადი განვითარების სამინისტროს მეწარმეობის განვითარების სააგენტო ამერიკის შეერთებული შტატების მასშტაბით აქტიურად აგრძელებს ახალი, კინოინდუსტრიის ხელშეწყობის კომპონენტის „გადაიღე საქართველოში“ პოპულარიზაციას.
ლოს-ანჯელესში წამყვანი საგამოფენო ღონისძიება, AFCI locations show, რომელიც მთელი მსოფლიოს მასშტაბით კინოინდუსტრიის წარმომადგენლებს 30-ზე მეტი ქვეყნიდან უყრის თავს, ქართულ სტენდს მასპინძლობს.
ქართული სტენდის ქვეშ მეწარმეობის განვითარების სააგენტოს ორგანიზებითა და ძალისხმევით ქართულ კერძო საპროდიუსერო კომპანიებს ეძლევათ შესაძლებლობა დაამყარონ კავშირები ამერიკის შეერთებული შტატების მასშტაბით ცნობილ კინომწარმოებლებთან და გააცნონ თავიანთი შესაძლებლობები.
საგამოფენო შოუს ფარგლებშივე, საქართველოს ეკონომიკისა და მდგრადი განვითარების მინისტრის მოადგილემ, ქეთევან ბოჭორიშვილმა სხვა სამთავრობო წარმომადგენლებთან ერთად მონაწილეობა მიიღო პანელ დისკუსიაში პროდიუსერებისათვის დაფინანსების შესაძლებლობებთანდაკავშირებით. მინისტრის მოადგილემ აუდიტორიას ახალი, კინოინდისტრიის წახალისების კომპონენტი, ასევე შემუშავებული ე.წ cash rebate მექანიზმი გააცნო და ყურადღება გაამახვილა საქართველოს პოტენციალზე, კინოგადაღებისითვის საჭირო ყველანაირი რესურსის, მათ შორის პროფესიონალებით დაკომპლექტებული, მაღალი სტანდარტების შესაბამისი კომპანიების არსებობასა და საქართველოს, როგორც აღმოსავლეთ ევროპის კინოგადაღების ცენტრის შესაძლებლობებზე.
ამასთანავე, ლოს-ანჯელესში ვიზიტის ფარგლებში, ქართული დელეგაციის წევრები და კერძო საპროდიუსერო კომპანიების: JTW Metro, Millimeter Film და ABK communications წარმომადგენლებმა პირისპირ, ინდივიდუალური შეხვედრები გამართეს დაინტერსებულ პროდიუსერებთან, რომლის პარალელურადაც, მეწარმეობის განვითარების სააგენტოსა და საქართველოს კინემატოგრაფიის ეროვნული ცენტრის წარმომადგენლებმა სტენდის ვიზიტორებს ამომწურავად წარუდგინეს სამთავრობო ინციატივა, გადაღებისთვის ხელსაყრელი კონკრეტული ლოკაციები და პროგრამით გათვალისწინებული პირობები.
პროგრამის პოპულარიზაციის მიზნით, ლოს-ანჯელესში ვიზიტის ფარგლებში სააგენტოს ორგანიზებით 25 აპრილს დაგეგმილია ჰოლივუდის წამყვანი პროდიუსერების ოფიციალური მიღება, მათი მასპინძლობა და პროგრამის წარდგენა.
