„საქართველოს რკინიგზა“ მომხმარებელს სასიამოვნო სიახლეს სთავაზობს. 2016 წლის ზაფხული-შემოდგომის სეზონიდან მგზავრებს შესაძლებლობა ექნებათ ევროპული სტანდარტის Stadler Kiss მოდელის მატარებლით იმგზავრონ, რომლის ანალოგით დღეს ევროპის განვითარებულ ქვეყნებში მგზავრობენ.
ორსართულიანი, შვეიცარული კომპანიის Stadler Bussnang AG-ს ელექტრომატარებლები შავი ზღვის მიმართულებით განახორციელებენ მგზავრების კომფორტულ გადაყვანას. ოთხი ახალი მატარებელი საჭირო ყველა თანამედროვე მოწყობილობით, ულტრათანამედროვე ტიპის უსაფრთხოების სისტემებით არის აღჭურვილი, რომელიც სრულ შესაბამისობაშია ევროპულ უსაფრთხოების სტანდარტებთან. ქართულ რეალობაში ეს იქნება პირველი მატარებელი, რომელიც სრულად იქნება მორგებული შეზღუდული შესაძლებლობების მქონე პირების საჭიროებებზე.
“საქართველოს რკინიგზის“ ინფორმაციით, ორსართულიანი მატარებელი თბილისიდან შავი ზღვის მიმართულებით იმოძრავებს შეჩერების გარეშე და მხოლოდ ზღვისპირა კურორტების სადგურებში გაჩერება, ესენია: ბათუმი, ქობულეთი და ურეკი.
ახალი მატარებლები ზღვისპირა რეგიონში მგზავრობას ტურისტებისთვის და ადგილობრივი მგზავრებისთვის უფრო მეტად კომფორტულს გახდის, რაც ტურიზმის განვითარებას შეიწყობს ხელს.
„Stadler Kiss მოდელის ელექტრომატარებლებით მგზავრების გადაყვანა თამადად შეიძლება ითქვას ახალი ეტაპი და წინ გადადგმული ნაბიჯია „საქართველოს რკინიგზის“ მომსახურების განვითარების სფეროში“, აცხადებენ „საქართველოს რკინიგზაში“.
კომპანიაში ირწმუნებიან, რომ სერვისის გაუმჯობესების შემდეგ მგზავრობის ღირებულების ტარიფები არ შეიცვლება.
