ნარჩენების გადამამუშავებელი ქარხნის მშენებლობა-მართვის უზრუნველსაყოფად ბათუმის მერიის მიერ გამოცხადებულ კონკურსში წინადადებების მიღება უკვე დასრულდა.
დღეს მერიაში კომისიის პირველი სხდომა გაიმართა, რომელმაც განსახილველად წარმოდგენილი 4 შემოთავაზებიდან საუკეთესო უნდა გამოავლინოს. კომისიის მუშაობაში ჩართულია გაეროს განვითარების პროგრამის მიერ საგანგებოდ მოწვეული ექსპერტიც.
პირველ ეტაპზე კომპანიების მიერ მსგავსი პროექტების განხორციელების გამოცდილებისა და ზოგადი ბიზნეს გეგმის შეფასება მოხდება.
მეორე ეტაპზე გადასული კომპანიები კი დეტალური ტექნიკურ-ეკონომიკური დასაბუთებისა და ფინანსური დოკუმენტაციის საფუძველზე შეფასდებიან.
გამარჯვებულ კომპანიასთან მერია მემორანდუმს გააფორმებს, რომლის საფუძველზეც დაიწყება თანამშრომლობა თანამედროვე ტექნოლოგიებით აღჭურვილი, მყარი საყოფაცხოვრებო ნარჩენების გადამამუშავებელი ქარხნის მშენებლობისა და მართვის უზრუნველსაყოფად.
დღევანდელ სხდომაზე კომისიამ „ინტერესთა გამოხატვის“ პირველ ეტაპზე წარმოდგენილი 4 წინადადება გახსნა.
პირველი ეტაპის შედეგებს კომისია 45 დღის ვადაში გამოაცხადებს. ამ ხნის განმავლობაში კომისია და სამუშაო ჯგუფი, გაეროს განვითარების პროგრამის მიერ გამოყოფილ ექსპერტთან ერთად, კიდევ რამდენიმე სამუშაო შეხვედრას გამართავენ წინადადებების განხილვისა და მეორე ეტაპის კრიტერიუმების შემუშავების მიზნით. გამარჯვებული კომპანია, ყველა აუცილებელი პროცედურის შესაბამისად, 6 თვის ვადაში გამოვლინდება.
