საპარლამენტო უმცირესობა მიიჩნევს, რომ მმართველი გუნდის წარმომადგენლები მათ მიერ ინიცირებულ საკითხებს ხელოვნურად ,,აჩოჩებენ“.
,,ნაციონალმა“ დეპუტატმა მიხეილ მაჭავარიანმა ბიუროს დღევანდელ სხდომაზე ვიცე-სპიკერ მანანა კობახიძეს მიმართა და ვიზალიბერალიზაციასთან დაკავშირებით, ევროპული სტრუქტურებისადმი მიმართვის რეზოლუციის საკითხის გაჭიანურება გააპროტესტა.
”ქალბატონო მანანა, 8 წლის განმავლობაში პარლამენტის ვიცე-სპიკერი ვიყავი და ძალიან კარგად ვიცი, როგორ ხდება საკითხების ჩაჩოჩება-მიჩოჩება”, - მიმართა კობახიძეს მაჭავარიანმა.
კობახიძემ განაცხადა, რომ ამ შენიშვნას ვერ მიიღებს. მისი განმარტებით, ”როგორც ჩანს განსახილველ საკითხებს ”ნაციონალური მოძრაობის” წარმომადგენლები ”აჩოჩებდნენ”, თავად კი შეფასებას საკითხების ”მოტეხვისა” და ”ჩაჩოჩების” შესახებ ვერ გაიზიარებს.
სხდომის წამყვანმა ასევე განმარტა, რომ პარლამენტი ჯერ იხილავს დაჩქარებული წესით განსახილველ საკითხებს და მხოლოდ ამის შემდეგ იწყებს რეზოლუციის პროექტის და სხვა საკითხების განხილვას.
