დაკავებული ვასილ ლელუაშვილი ბრალს არ აღიარებს, - ამის შესახებ ლელუაშვილია ადვოკატმა, თამაზ კილანავამ ე.წ. მოდულში შესვლის წინ განაცხადა.
მისი თქმით, ეს საქმე არის შეკოწიწუბილი და ლელუაშვილი უდანაშაულოა.
”მოვედი ლელუაშვილის შესახვედრად, რათა გავერკვე საქმის გარემოებაში. წინასწარ შემიძლია გითხრათ, რომ ეს საქმე არის შეკოწიწუბილი და ლელუაშვილი უდანაშაულოა. ის ბრალს არ აღიარებს, რადგან უდანაშაულოა. გამორიცხულია, რომ ასეთი რამე მომხდარიყო. სასამართლო პროცესზე ვიყავი, როცა ეს გარემოება გახდა ჩემთვის ცნობილი, წამოვედი მის სანახავად. ბრალს არ აღიარებს და არ შეიძლება აღიარებდეს, რადგან არანაირი შემხებლობა არ ჰქონია", - განაცხადა თამაზ კილანავამ.
შეგახსენებთ, რომ მთავარმა პროკურატურამ პირადი ცხოვრების ამსახველი ჩანაწერების უკანონოდ მოპოვების ფაქტზე 5 პირი დააკავა. ერთი პირის დაკავება ვერ მოხერხდა, ვინაიდან მიემალა გამოძიებას, ხოლო ერთ პირს კი დაუსწრებლად წარედგინა ბრალდება. პროკურატურის მიერ დაკავებულნი არიან შს სამინისტროს კონსტიტუციური უსაფრთხოების დაცვის დეპარტამენტის დირექტორის ყოფილი მოადგილე ვასილ ლელუაშვილი; ამავე დეპარტამენტის ქ.თბილისის მთავარი სამმართველოს ყოფილი უფროსი რევაზ შიუკაშვილი; ამავე დეპარტამენტის ქ.თბილისის მთავარი სამმართველოს მე-3 სამმართველოს ყოფილი უფროსი რომან ზაალიშვილი;
შს სამინისტროს ქ.თბილისის მთავარი სამმართველოს ძველი თბილისის სამმართველოს ყოფილი უფროსი ირაკლი ყიფშიძე; შს სამინისტროს ქ.თბილისის მთავარი სამმართველოს ძველი თბილისის სამმართველოს მე-7 განყოფილების ყოფილი უფროსი ზურაბ პავლიაშვილი; შს სამინისტროს ქ.თბილისის მთავარი სამმართველოს ძველი თბილისის სამმართველოს მე-7 განყოფილების უფროსის ყოფილი მოადგილე გიგლა შიოშვილი მიემალა გამოძიებას, ხოლო კონსტიტუციური უსაფრთხოების დაცვის დეპარტამენტის მე-6 სამმართველოს ყოფილ უფროსს გივი კაციტაძეს დაუსწრებლად წარედგინა ბრალდება, ვინაიდან მას დატოვებული აქვს საქართველოს საზღვრები და თავს არიდებს საგამოძიებო ორგანოში გამოცხადებას.
დაკავებულებს ბრალი წარედგინათ საქართველოს სისხლის სამართლის კოდექსის 333-ე მუხლის მესამე ნაწილის „გ“ ქვეპუნქტით გათვალისწინებული დანაშაულის ჩადენისთვის, რაც გულისხმობს სამსახურებრივი უფლებამოსილების გადამეტებას დაზარალებულის პირადი ღირსების შეურაცხყოფით. აღნიშნული დანაშაული სასჯელის სახედ და ზომად ითვალისწინებს თავისუფლების აღკვეთას 5-დან 8 წლამდე ვადით.