საქართველოსა და რუსეთს შორის 29 აპრილიდან რეგულარული საზღვაო რეისები შესრულდება.ქალაქ ბათუმსა და სოჭს სამგზავრო სწრაფმავალი ხომალდი “კომეტა” დააკავშირებს. ინფორმაციას ამის შესახებ რუსული საგენტო Sputnik ავრცელებს. რეისებს ქართული კომპანია “ექსპრეს-ბათუმი” განახორციელებს.
“მიმდინარე წელს რუსეთიდან მოსალოდნელია ტურისტების დიდი ნაკადი, რადგან რუსულ-თურქული ურთიერთობების გაუარესების გამო ბევრი ადამიანი თურქეთში ვერ ჩადის და ბათუმში გეგმავს დასვენებას. ჯერჯერობით არ არის დიდი მოთხოვნა, რადგან ტურისტული სეზონი ჯერ არ დაწყებულა, ტურისტების რაოდენობის სერიოზულ ზრდას მაისის ბოლოდან-ივნისის დასაწყისიდან ველით”, - განაცხადა კომპანია “ექსპრეს-ბათუმის” დირექტორმა ზურაბ კირცხალიამ.
ტურისტული სეზონის დაწყებამდე ხომალდი “კომეტა" კვირაში ერთ რეისს შეასრულებს. ხომალდი ხუთშაბათს ბათუმიდან გაემგზავრება, პარასკევს კი - სოჭიდან. კარგი ამინდის პირობებში რეისს დაახლოებით ხუთი საათი დასჭირდება.
