მე-11 დღეა რაც ტყიბულში მინდელისა და ძიძიგურის სახელობის შახტების მუშები გაფიცულები არიან. გაფიცულებს ადგილობრივი მოსახლეობასთან ერთად ზესტაფონის ფეროს მუშები და მეტალურგიული, სამთო და ქიმიური მრეწველობის მუშაკთა პროფკავშირი უცხადებს სოლიდარობას.
გაფიცულებთან სახალხო დამცველის რეგიონალური ოფისის წარმომადგენლები ვითარების შესასწავლად ჩავიდნენ.
პროცესებს აკვირდებიან EMC-ის თანამშრომლები, რომლებიც ტყიბულში იმყოფებიან გაფიცულ მეშახტეებთან ერთად და საზოგადოებას მიმდინარე ვითარებაზე აწვდიან ინფორმაციებს.
მუშები სახელმწიფოს მაღალი პოლიტიკური თანამდებობის პირების ჩართვას ითხოვენ და დაუყოვნებლივი ნაბიჯების გადადგმას კრიზისში შესული პროტესტის მოსაგვარებლად.
აქციის მონაწილეები უკმაყოფილებას გამოთქვამენ მედიის მუშაობასთან დაკავშირებით. მათი განცხადებით მედია ტენდენციურობას იჩენს და სრულყოფილად არ აშუქებს მოვლენებს. განსაკუთრებული უკმაყოფილება გამოიწვია, გუშინ ადმინისტრაციის შენობის წინ მომხდარი ინციდენტის გაშუქებამ, რომელიც მათი თქმით კონტექსტიდან ამოგლეჯილი იყო“.
გაფიცულები, „საქნახშირი ჯი-აი-ჯი საქართველოს“ განცხადებას გამოეხმაურენ და აცხადებენ, რომ საწარმო ულტიმატუმის ენით ელაპარაკება მათ. „როდესაც ამბობენ რომ თუ არ ვიმუშავებთ პროცესი არ დაიძვრება“- განაცხადა საგაფიცვო კმიტეტის ერთერთმა წევრმა“.
მუშები ასევე აცხადებენ, რომ „თუ კადრების შემცირებაა საჭირო იმისთვის, რომ მუშებს ხელფასები გაეზარდოთ, მაშინ ლოგიკურია ადმინსიტრაციაში დასაქმებულთა რაოდენობა შემცირდეს სადაც არადეკვატურად მაღალი ხელფასები აქვთ. მუშები ასევე საუბრობენ გაბერილ კადრებზე და ნეპოტიზმზე.
გაფიცულები გამოეხმაურენ ელზა ჯგერენაიას განაცხადებას და უარყოფენ იმ ფაქტს, რომ მაღალი საზოგადოებრივი ინტერესიდან გამომდინარე ჯანდაცვის სამინისტროს მედიატორები დავის მოგვარებაში ჩართული არიან.
მუშები, მოუწოდებენ სხვადსხვა ორგანიზაციებს და ჯგუფებს, სამთავრობო თუ არასამთავრობო წარმომადგენლებს მხარდაჭერისკენ.
აქვე გთავაზობთ ტყიბულელი მეშახტეების საჯარო მიმართვა ხელისუფლებას:
ტყიბულში გაფიცული დასაქმებულები მოვითხოვთ ტყიბულში მიმდინარე გაფიცვის პროცესში სახელმწიფოს მაღალი პოლიტიკური თანამდებობის პირების ჩართვას და დაუყოვნებლივი ნაბიჯების გადადგმას კრიზისში შესული პროტესტის ნორმალიზებისთვის.
დღეს, ტყიბულში გაფიცვის პროცესის დაწყებიდან მე-10 დღეს, მიუხედავად დასაქმებულთა სამართლიანი მოთხოვნებისა, საწარმოს შესაბამისი პასუხისმგებელი პირები არ ხვდებიან დასაქმებულებს მათი მოთხოვნების განხილვის მიზნით. გაფიცვის მასშტაბების და სიმწვავის გათვალისწინებით, მიმდინარე პროცესზე არ რეაგირებს სახელმწიფო და დასაქმებულებს საწარმოსთან უთანასწორო დაპირისპირებაში მარტო ტოვებს.
სახელმწიფოსა და საწარმოს ჩარევისა და რეაგირების გარეშე გასული თითოეული დღე უფრო მეტად ამწვავებს ისედაც ჩიხში შესულ პროცესს და შესაძლოა არსებული უკმაყოფილება უკონტროლო პროცესში გადავიდეს. პროცესების ამგვარი განვითარების შემთხვევაში, დამდგარ შედეგებზე სრული პასუხისმგებლობა ეკისრება სახელმწიფოს და საწარმოს, რომელიც მიმდინარე მოვლენებს სამართლებრივი პროცედურების ჭრილში განიხილავს და უგულვებელყოფს პროცესის სოციალურ მნიშვნელობას.
შეუქცევადი პროცესის თავიდან აცილების და მუშათა მოთხოვნების დაუყოვნებლივი განხილვის მიზნით, ტყიბულის გაფიცული მუშები მივიჩნევთ, რომ აუცილებელია მოლაპარაკებებების პროცესის დაწყება შემდეგი პოლიტიკური თანამდებობის პირების ჩართულობით:
- საქართველოს შრომის, ჯანმრთელობისა და სოციალური დაცვის მინისტრი;
- საქართველოს ეკონომიკისა და მდგარი განვითარების მინისტრი;
- საქართველოს ენერგეტიკის მინისტრი;
- საქართველოს მთავრობის ეკონომიკური საბჭოს წარმომადგენელი;
- საქართველოს პარლამენტის დარგობრივი ეკონომიკის და ეკონომიკური პოლიტიკის კომიტეტის თავმჯდომარე;
- საქართველოს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე;
გაფიცულები ასევე ითხოვენ საქართველოს სახალხო დამცველის უშუალო ჩართვას პროცესებში.
ყოველივე ზემოთთქმულიდან გამომდინარე მოვითხოვთ:
დღეს დასახელებული თანამდებობის პირების მიერ გაკეთდეს საჯარო განცხადება მოლაპარაკების პროცესის დაუყოვნებლივი დაწყების თაობაზე და ხვალ მათი პირადი მონაწილეობით დაიწყოს მოლაპარაკების პროცესი ტყიბულში. წინააღმდეგ შემთხვევაში საგაფიცვო კომიტეტი იქნება იძულებული მოიხსნას პასუხისმგებლობა მიმდინარე პროცესებზე.
