ფრაქცია „რესპუბლიკელების“ თავმჯდომარე დავით ბერძენიშვილი ფრაქცია „მრეწველების“ თავმჯდომარეს, გოგი თოფაძეს ანტისახელმწიფოებრივ და ანტიქართულ კამპანიაში ადანაშაულებს. როგორც ბერძენიშვილმა დღევანდელ პლენარულ სხდომაზე განაცხადა, თოფაძის მიერ გაკეთებულ განცხადებები შეტევაა საქართველოს თავდაცვის მინისტრის, თინათინ ხიდაშელის წინააღმდეგ.
ბერძენიშვილმა კოალიციაში შემავალ პარტიებს მოუწოდა, ამ განცხადებებზე რეაგირება მოახდინონ.
„მინდა, გოგი თოფაძის განცხადებას გამოვეხმაურო, რომელიც მორიგი შეტევაა საქართველოს თავდაცვის მინისტრის, თინათინ ხიდაშელის წინააღმდეგ.
ხაზსგასმით ვამბობ, რომ კოალიცია „ქართული ოცნების“ პოლიტსაბჭოს წევრის სტატუსით ვსაუბრობ. ამ თემაზე პოლიტსაბჭოზეც ვისაუბრეთ, მაგრამ მინდა, საზოგადოებამ იცოდეს, რომ ორკესტრირებული კამპანია საქართველოს თავდაცვის მინისტრის მიმართ და სამიზნედ შერჩეული იქნა ამ ევროატლანტიკურ ასპარეზზე ჩვენი ხელისუფლების თანამდებობის პირი. გოგი თოფაძის მიერ პარლამენტის შიგნით თუ გარეთ, განსაკუთრებით მის გარეთ მხარდაჭერების თუ შემკვეთების შესრულებით არის ანტიკოალიციური, ანტისახელმწიფოებრივი, ანტიქართული კამპანია. „მრეწველთა“ ფრაქციის წევრებისგან, რომლებიც „ქართული ოცნების“ წევრები არიან ველი, რომ პასუხს გასცემენ იმას, მათ რამდენად შესაძლებელად მიაჩნიათ, ამ ფრაქციაში ამ თავმჯდომარის პირობებში საქმიანობის გაგრძელება.
ზურაბ ტყემალაძისგან ევროინტეგრაციის არჩევანის დამადასტურებელი განცხადებები არაერთხელ მოგვისმენია და მაინტერესებს, რას ფიქრობს თოფაძის განცხადებაზე? არავითარ შუაშია საგარეჯოს არჩევნები, რომელზეც პასუხი გაცემული ყველა ინსტანციის მიერ. ტელეკომპანია „ობიექტივში“ ჟურნალისტმა სცადა, „რესპუბლიკური პარტიის“ წინააღმდეგ კამპანია გაემიჯნა, მაგრამ არა, პერსონალურად თინათინ ხიდაშელია მის სამიზნედ ამოღებული. ვოლსკი გამობრძანდა და არ შეეხო ამ თემას, ალბათ ჟურნალისტებთან მსუყედ აპირებს განცხადების გაკეთებას“, - განაცხადა ბერძენიშვილმა.
