ევროკავშირი საქართველოს სტრატეგიული პარტნიორია, რომლის მხარდაჭერით საქართველოში დემოკრატიული რეფორმები ხორციელდება, - ამის შესახებ საქართველოს პრემიერ-მინისტრ გიორგი კვირიკაშვილისა და საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენლის, ფედერიკა მოგერინის შეხვედრაზე აღინიშნა.
მიუნხენის უსაფრთხოების კონფერენციის ფარგლებში გამართული შეხვედრის ძირითადი თემები ვიზების ლიბერალიზაციის და ასოცირების ხელშეკრულების იმპლემენტაციის საკითხები იყო.
აღინიშნა, რომ ვიზების ლიბერალიზაციის პროცესის დასრულება საქართველოს დღის წესრიგის ერთ-ერთი უმთავრესი საკითხია.
გიორგი კვირიკაშვილმა ფედერიკა მოგერინის ვიზის ლიბერალიზაციის პროცესში შეტანილი პირადი წვლილისთვის მადლობა გადაუხადა. საუბარი ასევე, შეეხო ღრმა და ყოვლისმომცველი თავისუფალი სავაჭრო სივრცის შეთანხმების განხორციელების გზებს და ევროკავშირთან სავაჭრო-ეკონომიკური ინტეგრაციის პერსპექტივებს.
მხარეებმა ისაუბრეს „ერთიანი მხარდაჭერის ჩარჩოზე“, რომლის ფარგლებშიც, ევროკავშირი საქართველოს რეფორმების განხორციელებისთვის დახმარებას გაუწევს.
შეხვედრაზე შეთანხმდნენ, რომ ევროკავშირის დახმარება ორიენტირებული იქნება კერძო სექტორზე, რათა ევროპულ სტანდარტებს მიუახლოვდეს.
საქართველოს პრემიერ-მინისტრმა და ევროკავშირის უმაღლესმა წარმომადგენელმა რეგიონის უსაფრთხოების თემები და არსებული გამოწვევები განიხილეს. ასევე საქართველოს ოკუპირებულ ტერიტორიებზე შექმნილ ვითარებაზე იმსჯელეს.
შეხვედრას საქართველოს საგარეო საქმეთა მინისტრი მიხეილ ჯანელიძე, პარლამენტის საგარეო ურთიერთობათა კომიტეტის თავმჯდომარე თედო ჯაფარიძე და საქართველოს საგანგებო და სრულუფლებიანი ელჩია გერმანიის ფედერაციულ რესპუბლიკაში ლადო ჭანტურია დაესწრნენ.