,,ნაციონალური მოძრაობის“ საგარეო ურთიერთობათა მდივანი გიგა ბოკერია დიპლომატიური კორპუსის წარმომადგენლებს შეხვდა. მისი თქმით, დისკუსია შედგა საქართველოსთვის მნიშვნელოვან ყველა საკითხზე და საუბრის ერთ-ერთი თემა იყო საპარლამენტო არჩევნების წინ შექმნილი ვითარება.
"ერთ-ერთი ასპექტი იყო ის, თუ რა ატმოსფერო გვაქვს ოქტომბრის გადამწყვეტი არჩევნების წინ, რომელშიც მე დარწმუნებული ვარ, რომ ივანიშვილის რეჟიმი დამარცხდება. მაგრამ რა საფრთხეები გვაქვს სწორედ ივანიშვილის რეჟიმისგან, როგორ შეეცდებიან ისინი ძალაუფლების შენარჩუნებას და რა რისკის ქვეშ ჩააგდებენ ჩვენს ქვეყანას. იქაც კი, სადაც ხელისუფლებას აპრიორი აქვს ავტომატური უპირატესობა [გარდაბნის არჩევნებზე] და ეს ყველამ იცის წინასწარ, რა მეთოდები გამოიყენეს... რა თქმა უნდა, ამაზე დისკუსია ძალიან მნიშვნელოვანია, რადგან ეს ჩვენი მოქალაქეების, ჩვენი ქვეყნის უმთავრესი ინტერესია, რომ ივანიშვილის რეჟიმი გავუშვათ და ეს აუცილებლად მოხდება მშვიდობიანად. საქართველოს ყველა მეგობრის ამოცანაა, რომ ამას ხელი შეუწყონ, თუმცა ეს მათი გადასაწყვეტი არ არის. ამიტომ, რა თქმა უნდა, ამ დეტალებზე გვქონდა საუბარი. ჩვენ ყველაფერს გავაკეთებთ, როგორც პასუხისმგებლობის მქონე დემოკრატიული ოპოზიცია, რომ ჩვენი მხრიდან ხელი შევუწყოთ ასეთი ფაქტების არდაშვებას, მაგრამ ეს მთლიანად არ არის ჩვენს ხელში. ჩვენს ხელში და ქართველი ხალხის ხელშია ნამდვილად ივანიშვილის გაშვება, მაგრამ რამდენად მშვიდად მოხდება ეს ყველაფერი, სხვა ფაქტორებზეც არის დამოკიდებული", - განაცხადა ბოკერიამ.
