ბრიუსელის შემდეგ, ქართული დელეგაცია საქართველოს თავდაცვის მინისტრის ხელმძღვანელობით, შეხვედრებს მიუნხენში გააგრძელებს.
მიუნხენის უსაფრთხოების კონფერენციის ფარგლებში, თინათინ ხიდაშელი უცხოელ კოლეგებს შეხვდება. საერთაშორისო ფორუმზე საქართველოს თავდაცვის მინისტრი და ქართული დელეგაციის წევრები სხვადასხვა ფორმატში გამართულ ღონისძიებებშიც მიიღებენ მონაწილეობას.
„მიუნხენში ბევრი ორმხრივი შეხვედრა გვაქვს დაგეგმილი. მათ შორის თავდაცვის მინისტრებთან, ვისთანაც ბრიუსელში ვერ მოვახერხეთ შეხვედრა სხდომების ინტენსიური გრაფიკის გამო. გარდა ამისა, რამდენიმე შეხვედრა დაგეგმილია პრემიერთან ერთად. ჩვენ, ბუნებრივია, ვმონაწილეობთ იმ დისკუსიებში, რომელიც კონფერენციის ფარგლებში გაიმართება. ძალიან აქტუალურია დღეს მიუნხენის კონფერენცია იმ გამოწვევების გათვალისწინებით, რომელიც არსებობს ჩვენ დიდ სამეზობლოში“, - განაცხადა თინათინ ხიდაშელმა.
მიუნხენის უსაფრთხოების კონფერენცია წამყვანი საერთაშორისო და დამოუკიდებელი ფორუმია საგარეო და უსაფრთხოების პოლიტიკის სფეროში.
ყოველწლიურ კონფერენციაზე მიუნხენში გადაწყვეტილების მიმღები პირები და ექსპერტები, სახელმწიფო ლიდერები, საგარეო და თავდაცვის მინისტრები, დიპლომატები, სამხედრო ლიდერები, პარლამენტარები, საერთაშორისო და არასამთავრობო ორგანიზაციების წარმომადგენლები, კერძო სექტორის ექსპერტები, აკადემიკოსები იკრიბებიან.
კონფერენციის მონაწილეები გლობალური უსაფრთხოების არსებულ და მოსალოდნელ საფრთხეებს განიხილავენ და მათი გადაჭრის გზებზე მსჯელობენ.
წლევანდელი კონფერენციის მთავარი თემებია: ევროპის პასუხი ლტოლვილთა კრიზისზე, სირიაში მიმდინარე ომი და ევროპის უსაფრთხოების წესრიგი.
