საგარეო საქმეთა და უსაფრთხოების პოლიტიკის სფეროში ევროპის კავშირის უმაღლესმა წარმომადგენელმა, ფედერიკა მოგერინიმ და ევროპის სამეზობლო პოლიტიკისა და გაფართოების საკითხებში ევროკომისარმა, იოჰანეს ჰანმა საქართველს პარლამენტს მადლობის წერილი გამოუგზავნეს
საქართველოს პარლამენტის ინფორმაციით, ევროპელი დიპლომატები საქართველოს ხელისუფლების და პარლამენტის მიერ ბოლო სამი წლის განმავლობაში განხორციელებულ ცვლილებებს მნიშვნელოვნად აფასებენ და ამბიციური რეფორმების გაგრძელების და ევროპის საუკეთესო გამოცდილების გაზიარების იმედს გამოთქვამენ. მათი შეფასებით, ვიზალიბერალიზაციის პროცესში მიღწეული შედეგი გაცილებით გააადვილებს და გააიოლებს ადამიანთა შორის კონტაქტებს, რაც საქართველოს ევროკავშირთან პოლიტიკურ ასოცირებას და ეკონომიკურ ინტეგრაციას კიდევ უფრო შეუწყობს ხელს.
ევროკომისრების მიერ მომზადებული წერილის ადრესატებს პარლამენტის თავმჯდომარე, საპარლამენტო უმრავლესობაში შემავალი ფრაქციების თავმჯდომარეები, საგარეო და ევროპასთან ინტეგრაციის კომიტეტების პირველი პირები და ევრონესტის საპარლამენტო ასამბლეის თანაპრეზიდენტი წარმოადგენენ.
