ქ.თბილისის მერიის ა(ა)იპ „სამართლებრივი დახმარებისა და საზოგადოებრივი ჩართულობის მუნიციპალური ცენტრი“-ს პროექტმა „იურიდიული კლინიკა - ჩემი ადვოკატი“ საქართველოს უნივერსიტეტის სამართლის სკოლასთან ურთიერთთანამშრომლობის მემორანდუმი გააფორმა, რომლის ფარგლებშიც საქართველოს უნივერსიტეტის სამართლის ფაკულტეტის მაგისტრატურის სტუდენტები, სამოქალაქო და ადმინისტრაციულ სამართალში პრაქტიკულ კურსს იურიდიულ კლინიკა - ჩემ ადვოკატში გაივლიან. სტუდენტები, ორგანიზაციის ტრენერ-ადვოკატების ზედამხედველობით მოქალაქეებს სამართლებრივ დახმარებას გაუწევენ და როგორც სასამართლო ისე თვითმმართველობის ორგანოებში წარმომადგენლობას განახორციელებენ.
დედაქალაქის მერიის პრესსამსახურის ინფორმაციით, კურსის მიზანია, მაგისტრანტს საშუალება მიეცეს სამოქალაქო და ადმინისტრაციულ სამართალში მიღებული თეორიული ცოდნა პრაქტიკაში გამოიყენოს, გამოიმუშაოს სამართლებრივი პრობლემების დამოუკიდებლად გადაჭრისა და ადმინისტრირების უნარი. დამოუკიდებელი მუშაობის ფარგლებში სტუდენტი განახორციელებს სამართლებრივი ბაზისა და სასამართლო პრაქტიკის მოძიებასა და ანალიზს.
როგორც ა(ა)იპ „სამართლებრივი დახმარებისა და საზოგადოებრივი ჩართულობის მუნიციპალური ცენტრი“-ს დირექტორმა მარინა ბერაძემ განაცხადა, აღნიშნული პრაქტიკული კურსი იურიდიული ფაკულტეტის სტუდენტებს მომავალი პროფესიის განვითარებასა და პრაქტიკული ცოდნის გაღრმავებაში დაეხმარება. „ მოხარული ვარ, რომ „იურიდიული კლინიკა ჩემი ადვოკატი“ მომავალი იურისტების პრაქტიულ კურისი გავლასა და ახალბედა ადვოკატების აღზრდაში თავის წვლილს შეიტანს“.
საქართველოს უნივერსიტეტის სტუდენტები პრაქტიკულ კურსისს 8 თებერვლიდან დაიწყებენ.
შეგახსენებთ, რომ ქ.თბილისის მერიის არასამეწარმეო (არაკომერციული) იურიდიული პირი „სამართლებრივი დახმარებისა და საზოგადოებრივი ჩართულობის მუნიციპალური ცენტრი“ ახორციელებს პროექტს „იურიდიული კლინიკა - ჩემი ადვოკატი“, რომლის მთავარ მიზანს, საქართველოს მოქალაქეებისათვის სამოქალაქო და ადმინისტრაციულ სამართალში უფასო იურიდიული დახმარების გაწევა წარმოადგენს.
