სახელმწიფო მინისტრი დავით ბაქრაძე ევროპარლამენტის რეზოლუციას ეხმაურება. მისი თქმით, ტექსტში მნიშვნელოვანი რეკომენდაციებია გამოთქმული, თუმცა მათი უმეტესობა გათვალისწინებულია.
რეზოლუციას, რომელიც საქართველოს, უკრაინისა და მოლდოვას მიერ გაფორმებული ასოცირებისა და ღრმა და ყოვლისმომცველი თავისუფალი ვაჭრობის შესახებ შეთანხმებების შესახებ მიიღეს, ევროპარლამენტში გუშინ უყარეს კენჭი.
მინისტრის თქმით, სასამართლო და ძალოვან უწყებებში არსებულ ხარვეზებზე მუშაობა გრძელდება. რაც შეეხება რეზოლუციის იმ ნაწილს სადაც რუსთავი 2-ის საქმეა ნახსენები, მინისტრი აცხადებს, რომ იქვე მხარდაჭერილია მთავრობის ინიციატივაც.
"რეზოლუცია აღნიშნავს, რომ რუსთავი 2-ის საქმემ შესაძლოა ჩრდილი მიაყენა მედია პლურალიზმს ქვეყანაში და ამდენად, ძალიან მნიშვნელოვანი და მისასალმებელია საქართველოს მთავრობის ინიციატივა იმასთან დაკავშირებით, რომ უმასპინძლოს ევროპელ ექსპერტთა ჯგუფს ევროპიდან და ღიად გააცნოს ამ პროცესთან დაკავშირებული დეტალები", - განმარტა დავით ბაქარაძემ.
შეგახსენებთ, ევროპარლამენტი საქართველოს, უკრაინისა და მოლდოვას შესახებ მიღებულ რეზოლუციაში ასევე ხაზს უსვამს იმ ფაქტს, რომ სასამართლო უნდა იყოს გამჭვირვალე, მიუკერძოებელი და თავისუფალი პოლიტიკური მოტივებისგან.
