დარწმუნებული ვართ, რომ ნატოს გადაწყვეტილება დაეფუძნება საქართველოს მიღწევებს, - პასუხობს საქართველოს პრემიერ-მინისტრი გიორგი კვირიკაშილი აშიშ კუმარ სენთან (ბლოგი New Atlanticist) ინტერვიუში შეკითხვაზე არის თუ არა უფრო ოპტიმისტურად განწყობილი, რომ ივლისში დაგეგმილ ვარშავის სამიტზე საქართველო მიიღებს წევრობის სამოქმედო გეგმას თუ არა, ნათელ გზამკვლევს მაინც, მას შემდეგ, რაც ჩერნოგორიამ ნატოსგან მიიღო გაწევრების შეთავაზება.
კვირიკაშვილის თქმით, საქართველოს მიესალმება ჩერნოგორიისთვის გაკეთებულ შეთავაზებას ალიანსში გაწევრებასთან დაკავშირებით. მისი შეფასებით, ეს გადაწყვეტილება კიდევ ერთხელ ადასტურებს ნატოს მხრიდან ღია კარის პოლიტიკისადმი ერთგულებას.
”დღეს საქართველოს თანამშრომლობა ალიანსთან უფრო მტკიცეა, ვიდრე ოდესმე. ჩვენ წარმატებით ვახორციელებთ 2014 წლის უელსის სამიტზე დამტკიცებულ ნატო-საქართველოს არსებით პაკეტს. 2015 წლის აგვისტოში გაიხსნა ტრენინგისა და შეფასების ერთობლივი ცენტრი, რომელიც წარმოადგენს ყველაზე მსხვილ პროექტს პაკეტის ფარგლებში. ამის პარალელურად, თავდაცვის სამინისტროსთან თანამშრომლობის მიზნით საქართველოში გამოიგზავნა ნატოს ექსპერტთა ჯგუფი. 2015 წელს ჩატარდა ნატო-საქართველოს ფართომასშტაბიანი სამხედრო წვრთნები სახელწოდებით „მებრძოლი სული", - განაცხადა კვირიკაშვილმა და აღნიშნა,რომ საქართველო არის ნატოს მტკიცე მხარდაჭერის მისიის სიდიდით მეორე წვლილის შემტანი ავღანეთში.
”გარდა ამისა, 2015-2017 წლებში საქართველო უზრუნველყოფს ქართული ასეულის მონაწილეობას ნატოს სწრაფი რეაგირების ძალებში. ნატოს მისიებში მონაწილეობით საქართველომ დაამტკიცა, რომ მას აქვს საერთო უსაფრთხოების უზრუნველყოფის საქმეში წვლილის შეტანის უნარი. ამ ეტაპზე ნაადრევია ვარშავის ნატოს სამიტის შედეგებზე ლაპარაკი. ჩვენ დარწმუნებული ვართ, რომ ნატოს გადაწყვეტილება დაეფუძნება საქართველოს მიღწევებს, ასახავს პროგრესს საქართველოს ინტეგრაციის გზაზე და კიდევ უფრო ახლოს მიგვიყვანს ჩვენს საბოლოო მიზანთან, ანუ ნატოს წევრობასთან”, - განაცხადა გიორგი კვირკაშვილმა.