მარჯვენასაჭიანი ავტომობილების რეგისტრაციის აკრძალვამ 1-ლი მარტის ნაცვლად, 1 ივნისიდან მოხდება, - ამის შესახებ „ჯი-ეიჩ-ენს” პარლამენტის იურიდიული კომიტეტის თავმჯდომარემ ვახტანგ ხმალაძემ განუცხადა.
მისი თქმით, მთავრობასა და პარლამენტს შორის თარიღის გადაწევაზე შეთანხმება უკვე მიღწეულია და მიზეზად იმას ასახელებს, რომ ფიზიკურ პირებს თუ დილერებს ამ ავტომანქანების იმპორტირების პროცესი დასრულებული არ ჰქონდეთ.
ამასთან, მისი თქმით, რეგისტრირებული მარჯვანასაჭიანი ავტომანქანების შემდგომი ექსპლუატაციისას, მათი გაყიდვისას და ქვეყნიდან გატანისას არანაირი პრობლემა არ იქნება.
რაც მთავარია, ის ამბობს, რომ მთავრობა და პარლამენტი ფიქრობს, რომ იმპორტირებული ავტომანქანების დაბეგვრის რეჟიმი უნდა შეიცვალოს.
„ვფიქრობთ, რომ შედარებით ახალგაზრდა ავტომანქანებზე საბაჟო გადასახადის ოდენობა შემცირდეს და სადღაც 12 წელზე უფრო ძველ ავტომობილებზე საბაჟო გადასახადის ოდენობა გაიზარდოს. ამით, ერთი მხრივ, იმპორტიორს 7 წლის მანქანის შემოყვანა უფრო იაფი დაუჯდება, ვიდრე დღეს უჯდება. საბოლოო ჯამში კი ეს იქნება შედარებით იაფი მარჯვენასაჭიანი მანქანების ამოღების კომპენსაცია, რადგან ეს მარცხენასაჭიანი მანქანების შემოყვანას შედარებით გააიაფებს,“ - ამბობს ხმალაძე.
ამასთან, ის ჯერჯერობით ვერ აკონკრეტებს, როგორი იქნება გადასახადების ოდენობა და ამბობს, რომ ამაზე საპარლამენტო განხილვებისას შეთანხდებიან.