აზერბაიჯანი ჩვენი სტრატეგიული პარტნიორია, გაზპრომი კი ოკუპანტის ინსტრუმენტი, ამის შესახებ”თავისუფალი დემოკრატების“ ერთ-ერთმა ლიდერმა ალექსი პეტრიაშვილმა განაცხადა.
მისი თქმით, „ თავისუფალი დემოკრატები“ შეშფოთებული არიან ხელისუფლების მხრიდან გაზის მოწოდების საკითხებთან დაკავშირებით თვეების განმავლობაში საზოგადოებისთვის ჯერ ინფორმაციის დაფარვის, შემდეგ კი ურთიერთ საწინააღმდეგო ახსნა-განმარტებების მოწოდებით.
„ეს ბადებს სერიოზულ ეჭვს, რომ გაზპრომთან მოლაპარაკებების წარმოება ემსახურება არა სახელმწიფო, არამედ კერძო ინტერესების განხორციელებას და შესაძლოა წარმოადგენდეს ქვეყნის ენერგეტიკული დამოუკიდებლობისთვის სერიოზულ საფერთხეს. ეს მოლაპარაკებები განსაკუთრებით სახიფათოდ გვეჩვენება აზერბაიჯანული მხარის განცხადებების ფონზე, რომლის მიხედვით აზერბაიჯანს არ აქვს არავითარი პრობლემა გაზის რაოდენობასთან დაკავშირებით და მას შეუძლია საქართველოს ბუნებრივი აირი შეუფერხებლად მოწოდება, კონკრეტულად შაჰდენიზ 1 პროექტის ფარგლებში”, - განაცხადა პეტრიაშვილმა.
პეტრიაშვილმა აღნიშნა, რომ აუცილებელია მაქსიმალური ძალიხმევა აზერბაიჯანულ მხარესთან მოლაპარაკებების გზით საქართველოს სტაბილური და პოლიტიკურად უსაფრთხო გაზით მომარაგების უზრუნველსაყოფად
„მოვუწოდებთ საქართველოს ხელისუფლებას, კონკრეტულად კი მთავრობის მეთაურს ნუ დააყენებს საფრთხის ქვეშ არა მარტო საქართველოს, არამედ მთლიანად რეგიონის სტრატეგიული განვითარების მონაპოვარს. მონაპოვარს, რომელიც დაიწყო საქართველოს, აზერბაიჯანის და დასავლელი პარტნიორების სტრატეგიული შეთანხმებით და გრძელდება უკვე თითქმის ოცი წელია. მოვითხოვთ მიმართოს მაქსიმალური ძალისხმევა აზერბაიჯანულ მხარესთან მოლაპარაკებების გზით საქართველოს სტაბილური და პოლიტიკურად უსაფრთხო გაზით მომარაგების უზრუნველსაყოფად. გახსოვდეთ, აზერბაიჯანი ჩვენი სტრატეგიული პარტნიორია, გაზპრომი კი ოკუპანტის ინსტრუმენტი“, - განაცხადა ალექსი პეტრიაშვილმა.
