აქართველოს საგარეო საქმეთა მინისტრი მიხეილ ჯანელიძე შეხვდა საქართველოში აშშ-ის საგანგებო და სრულუფლებიან ელჩს იან კელის.
შეხვედრის ფარგლებში მხარეებმა განიხილეს ორ ქვეყანას შორის არსებული სტრატეგიული პარტნიორობის ფარგლებში მიმდინარე თანამშრომლობის ძირითადი მიმართულებები და მათი შემდგომი გაღრმავების პერსპექტივები. ყურადღება გამახვილდა საქართველოს ევროპული და ევროატლანტიკური ინტეგრაციის პროცესში აშშ-ს, როგორც სტრატეგიული პარტნიორის როლზე, ასევე დემოკრატიული რეფორმების განხორციელების, სავაჭრო-ეკონომიკური კავშირების გაღრმავებისა და საქართველოს რეგიონული ჰაბის ფუნქციის განვითარებაში აშშ-ს მხარდაჭერაზე.
საქართველოს საგარეო საქმეთა მინისტრმა და აშშ-ის ელჩმა განიხილეს 2016 წლის განმავლობაში დაგეგმილი მნიშვნელოვანი ღონისძიებები და დაადასტურეს უმაღლესი და მაღალი დონის ორმხრივი ვიზიტების გაცვლის მნიშვნელობა.
მხარეებმა იმსჯელეს საქართველოსა და რეგიონში მიმდინარე პროცესებზე. იან კელიმ კიდევ ერთხელ დაადასტურა აშშ-ის ურყევი მხარდაჭერა საქართველოს სუვერენიტეტის, ტერიტორიული მთლიანობის, ევროპული და ევროატლანტიკური კურსის და ეკონომიკური განვითარების მიმართ.
მხარეებმა ასევე ისაუბრეს საგარეო საქმეთა სამინისტროს სისტემაში დაგეგმილი მთელი რიგი ინიციატივების განხორციელების პროცესში აშშ-ის მხარდაჭერაზე. მხარეები შეთანხმდნენ, რომ გააგრძელებენ აქტიურ თანამშრომლობას საქართველო-აშშ-ის სტრატეგიული პარტნიორობის დღის წესრიგში არსებული საკითხების განხორციელების მიზნით.
