საქართველოს პრეზიდენტი მიიჩნევს, რომ საარჩევნო სისტემაში ცვლილებების ამოქმედების გადადება 2020 წლისთვის, არგუმენტირებული არ არის. გიორგი მარგველაშვილმა დღეს გამართულ ბრიფინგზე განაცხადა, რომ 2015 წელს, ფაქტობრივად, მთელი პოლიტიკური სპექტრ, ჩამოყალიბდა იმ შეხედულებაზე, თუ რა არის საუკეთესო ქართული სააარჩევნო სისტემისთვის.
,,პასუხი ამ თვალსაზრისით არის ნათელი, რომ საუკეთესო არის პროპორციულ სისტემაზე ქვეყნის გადაყვანა. განსხვავება მდგომარეობს მხოლოდ იმაში, თუ რა ვადები უნდა განისაზღვროს ამ პროექტის განხორციელების თვალსაზრისით. მთელი პოლიტიკური სპექტრი - არასამთავრობო ორგანიზაციები, ჩვენი საერთაშორისო პარტნიორები, მეტიც, საქართველოს მოსახლეობის 240 ათასზე მეტი ხელმოწერით დადასტურებული პეტიციით მხარს უჭერს იმ პოზიციას, რომ ეს განხორციელდეს 2016 წელსვე, ხოლო განსხვავებული პოზიციაა მმართველ კოალიციაში, რომელიც ამ ცვლილებას 2020 წლისთვის გეგმავს. მე ვფიქრობ, რომ მთლად არგუმენტირებული და გასაგები, თუ რატომ უნდა გადავდოთ ის, რაზეც ვთანხმდებით ყველა, რომ კარგია და მისაღებია კიდევ ოთხი წლით, გაუგებარია ჩემთვის”, - განაცხადა პრეზიდენტმა და ყველა პოლიტიკურ ძალას მოუწოდა უფრო ინტენსიური კონსულტაციების მეშვეობით მივიდნენ თანხმობამდე ამ საკითხთან დაკავშირებით.
