პრეზიდენტმა გიორგი მარგველაშვილმა გასული წლის ანგარიში პარლამენტს თებერვალში უნდა წარუდგინოს.
ქვეყნის პირველი პირის პარლამენტში სტუმრობის პროცედურას რეგლამენტი განსაზღვრავს, რომლის მიხედვით, პარლამენტი, როგორც წესი, ქვეყნის მდგომარეობის უმნიშვნელოვანეს საკითხებზე პრეზიდენტის ყოველწლიურ მოხსენებას საგაზაფხულო სესიის პლენარული სხდომების პირველ დღეს ისმენს.
რეგლამენტის გათვალისწინებით, პარლამენტის საგაზაფხულო სესია თებერვლის პირველ სამშაბათს იხსნება, მაგრამ შესაძლოა, პრეზიდენტი პირველივე სხდომაზე არ გამოცხადდეს და მისი საკანონმდებლო ორგანოში სტუმრობის თარიღი კონსულტაციების შედეგად შეთანხმდეს.
პარლამენტში გიორგი მარგველაშვილის გამოსვლას დაესწრება თუ არა მთავრობა, ეს საკითხი ჯერჯერობით უცნობია, თუმცა, გასულ წლებში, მინისტრები პრეზიდენტის არცერთ გამოსვლას არ დასწრებიან.
შეგახსენებთ, რომ 2015 წელს, პრეზიდენტი უწყებას 31 მარტს ეწვია, ხოლო 2014 წელს, 21 თებერვალს.
