დაინტერესებულ დამკვირვებელ ორგანიზაციებს საოლქო საარჩევნო კომისიის წევრების არჩევის პროცესზე დაკვირვების შესაძლებლობა ეძლევათ , - ამის შესახებ გადაწყვეტილება ღიაობისა და გამჭვირვალობის პრინციპებიდან გამომდინარე, ცენტრალურმა საარჩევნო კომისიამ (ცესკო) 4 იანვრის სხდომაზე მიიღო.
როგორც "ინტერპრესნიუსს" ცესკოდან აცნობეს, კანონით განსაზღვრული ხუთწლიანი ვადის ამოწურვის გამო, ცესკოში საოლქო საარჩევნო კომისიების 193 წევრის შესარჩევი კონკურსი მიმდინარეობს. ვაკანტურ ადგილებზე 771 განაცხადია შესული. ვინაიდან, საარჩევნო კანონმდებლობა მკაფიოდ არ განსაზღვრავს სამოქალაქო სექტორის მიერ არჩევის პროცედურებზე დაკვირვებას, ცესკომ მიიღო დადგენილება, რომელიც აღნიშნულ საკითხს არეგულირებს.
ორგანიზაციები, რომლებსაც არჩევის პროცესზე დაკვირვების სურვილი აქვთ, უნდა იყვნენ საქართველოს კანონმდებლობით დადგენილი წესით რეგისტრირებული არასამეწარმეო (არაკომერციული) იურიდიული პირები, რომლებსაც ამ კონკურსის გამოცხადებამდე ჩატარებულ ბოლო საერთო არჩევნებზე (გარდა რიგგარეშე არჩევნებისა) დაკვირვების გამოცდილება გააჩნიათ.
დაკვირვების მიზნით, უფლებამოსილმა ორგანიზაციებმა საკონკურსო კომისიის სამდივნოს 18 იანვრის 18:00 საათამდე წერილობით უნდა მიმართონ.
კონკურსში მონაწილე პირების შესახებ დეტალური ინფორმაცია ხელმისაწვდომია ცესკოს ვებ-გვერდზე:
http://www.cesko.ge/uploads/other/32/32296.pdf
http://www.cesko.ge/uploads/other/32/32297.pdf
მაღალი საზოგადოებრივი ინტერესიდან გამომდინარე, ცენტრალური საარჩევნო კომისია კვლავაც გააგრძელებს საზოგადოების ინფორმირებას საოლქო საარჩევნო კომისიის წევრების არჩევის მიმდინარეობის შესახებ და მიმართავს ყველა დაინტერესებულ მხარეს, ხელი შეუწყონ საარჩევნო ადმინისტრაციას პროცესების კანონშესაბამისად წარმართვაში.
