პარლამენტმა 2015 წლის განმავლობაში, საშემოდგომო, საგაზაფხულო და რიგგარეშე სესიებზე 490 კანონპროექტი მიიღო, საიდანაც მთავრობის მიერ ინიცირებული 329 პროექტი იყო.
როგორც „ჯი-ეიჩ-ენს“ პარლამენტის საორგანიზაციო დეპარტამენტში განუცხადეს, კანონპროექტების გარდა, საკანონმდებლო ორგანომ რამდენიმე ხელშეკრულება, შეთანხმება და კონვენცია მიიღო.
კერძოდ, პარლამენტმა საგაზაფხულო სესიაზე 24 ხელშეკრულება-შეთანხმება-კონვენცია მიიღო, ხოლო საშემოდგომო სესიაზე - 25.
ასევე, თუკი პარლამენტმა საგაზაფხულო სესიაზე 1095 დადგენილება მიიღო, საშემდგომო სესიაზე ეს ციფრი 506-მდე შემცირდა.
უწყების მიერ ასევე საშემოდგომო და საგაზაფხულო სესიებზე მიღებული იქნა თითო-თითო რეზოლუცია, განცხადება და მიმართვა.
რაც შეეხება კანონპროექტებს, პარლამენტმა საგაზაფხულო სესიაზე 317 კანონპროექტი მიიღო, საიდანაც 213 მთავრობის მიერ მომზადებული იყო, ხოლო საგაზაფხულო სესიაზე მიღებული 173 კანონპროექტიდან მთავრობის მიერ ინიცირებული 116 პროექტი იყო.
მთავრობის მსგავსად, ცვლილებები მოამზადეს პარლამენტის კომიტეტებმა. კერძოდ, საგაზაფხულო სესიაზე კომიტეტების მიერ 79 კანონპროექტი იქნა მომზადებული, საიდანაც ლიდერი იურიდიულ საკითხთა კომიტეტი იყო, რომელმაც 69 პროექტი მოამზადა. ასევე თითი-თითო ცვლილება მოამზადეს ადამიანის უფლებათა დაცვისა და დარგობრივი ეკონომიკისა და ეკონომიკური პოლიტიკის კომიტეტებმა, განათლების კომიტეტმა 3 პროექტის ინიცირება მოახდინა, ხოლო ჯანდაცვის კომიტეტმა ხუთი კანონპროექტი წარადგინა.
აღსანიშნავია, რომ საგაზაფხულო სესიაზე ცალკეული დეპუტატების მიერ 24 კანონპროექტი იქნა ინიცირებული. კერძოდ, პარლამენტში პროექტები ერთობლივად ან ცალ-ცალკე წარადგინეს - დავით ონოფრიშვილმა, გედევან ფოფხაძემ, ანზორ ბოლქვაძე, თამაზ მეჭიაურმა, თედო ჯაფარიძემ, ზაქარია ქუცნაშვილმა, თინა ხიდაშელმა, ირაკლი სესიაშვილმა, გია ჟორჟოლიანმა, ვახტანგ ხმალაძემ, თამარ კორძაიამ, ირაკლი ტრიპოლსკიმ, მანანა კობახიძემ, დავით საგანელიძემ, პაატა კიკნაველიძემ და ზვიად კვაჭანტირაძემ.
საგაზაფხულო სესიის მსგავსად, კომიტეტებში ცვლილებების ინიცირების კუთხით, ლიდერები ვახტანგ ხმალაძისა და ლერი ხაბელოვის კომიტეტი იყვნენ, რომლებმაც 10-10 პროექტი წარადგინეს, დიმიტრი ხუნდაძის კომიტეტმა 7 ცვლილება მოამზადა, ხოლო ეკა ბესელიას კომიტეტმა - ორი.
საშემოდგომო სესიაზე, ცვლილებების ინიცირების კუთხით აქტიური დეპუტატები ებანოიძე-მეჭიაური იყვნენ, რომელთაც ერთობლივად 14 პროექტი წარადგინეს, ნუკრი ქანთარიას, თამარ კორძაიასა და ირაკლი ჩიქოვანის ანგარიშზე ორ-ორი პროექტის ინიცირება ჩაიწერა, ხოლო თითო-თითო ცვლილებები გიორგი კახიანმა, გუგული მაღრაძემ, ნოდარ ებანოიძემ და გია გაჩეჩილაძემ მოამზადეს.
აღნიშნული მონაცემებიდან გამომდინარე, პროექტების ინიცირების კუთხით ყველაზე აქტიური დეპუტატი ნოდარ ებანოიძე გამოდის, რომელმაც კოლეგებთან და ინდივიდუალურად, საბოლოო ჯამში, წლის მანძილზე, 17 პროექტი მოამზადა.
შეგახსენებთ, რომ პარლამენტი ზამთრის შვებულებაში გავიდა, საჭიროებისამებრ, რიგგარეშე სხდომებს გამართავს, მაგრამ უწყება საგაზაფხულო სესიას თებერვლის პირველ სამშაბათს გახსნის, რომელიც მერვე მოწვევის პარლამენტში ბოლო საგაზაფხულო სესია იქნება.
