პარლამენტის ვიცე-სპიკერი გუბაზ სანიკიძე ინტერესდება, საქართველოს პრემიერ-მინისტრმა, ირაკლი ღარიბაშვილმა პოსტი რატომ დატოვა.
დღევანდელ რიგგარეშე სხდომაზე, სამთავრობო განხილვების დროს, სანიკიძემ აღნიშნა, რომ პრემიერ-მინისტრი რატომ წავიდა, საზოგადოებამ უნდა იცოდეს.
„აქ საუბარი არ არის პერსონაზე - ირაკლი ღარიბაშვილზე, არამედ პასუხი ქართულ სახელმწიფოს სჭირდება. ამ შემთხვევაში ქართული საზოგადოება ერთსულოვანი ვართ, რადგან ამ დარბაზში რამდენიმე კაცმა იცის, ირაკლი ღარიბაშვილი რატომ წავიდა. ეს სახელმწიფოსთვის ძალიან მნიშვნელოვანია. ჩვენი ცხოვრება როგორ გაგრძელდება, ამისთვის მნიშვნელობა ენიჭება იმას, თუ როგორ წავიდა პრემიერ-მინისტრი?! ის ვერსია, რომ პრეცედენტი იქმნება, პოლიტიკური მოღვაწეობის პიკზე ადამიანი უნდა წავიდეს, ჩემთვის პირადად დამაჯერებელი არ არის და თან მიუღებელიცაა. გამონაკლისია ბიძინა ივანიშვილი, რომელმაც დააანონსა, რომ პოლიტიკიდან მალე წავიდოდა, მაგრამ არ მგონია, რომ პრემიერ-მინისტრებმა მომავალში ასეთი პირობა უნდა დადონ. საქართველოს ეს არ სჭირდება. კეთილი უნდა ვინებოთ და მთავრობამ თუ პარლამენტმა ჩვენს ქმედებაზე პასუხი უნდა ვაგოთ“, - აღნიშნა დეპუტატმა.
ამას გარდა, სანიკიძემ ყურადღება „ეროვნული ფორუმის“ საქმიანობაზე გაამახვილა და აღნიშნა, რომ მისი პარტია პოლიტიკური პოსტების კოლექციონერობით არ გამოირჩევა.
„ბევრი ჩვენს სისუსტედ იმას თვლის, „ეროვნულ ფორუმს“ პოსტები თუ რატომ არ გვიკავია. „ეროვნული ფორუმი“ იმ პოლიტიკას აგრძელებს, რითაც ჩვენ კოალიციაში დავიწყეთ. ბიძინა ივანიშვილმა აღნიშნა, კახა შარტავამ მასტერ-კლასი ჩაგვიტარაო. ჩვენ თანამშრომლობის მასტერ-კლასს ვაგრძელებთ, მაგრამ ერთი საკითხი, სადაც ჩვენ ძალიან პრინციპული პოზიცია გვიჭირავს, ეს ქართული სახელმწიფოა, მისი სვე-ბედი და მომავალია. აქ ძალიან პრინციპულები ვართ და ჩვენ ძალიან გვიჭირს, აქ კომპრომისზე წავიდეთ. შეკითხვა და პრობლემა ორ საკითხშია, რომელიცაა საღვთო კანონები და ადამიანების მიერ შექმნილი კანონები“, - განაცხადა სანიკიძემ.
