პრემიერ-მინისტრობის კანდიდატმა გიორგი კვირიკაშვილმა პარლამენტის რიგგარეშე სხდომაზე რუსეთთან ურთიერთობების შესახებაც ისაუბრა და აღნიშნა, რომ მთავრობა გააგრძელებს პრაგმატულ, მშვიდობაზე ორიენტირებულ პოლიტიკას.
"ეს არის ძალიან მნიშვნელოვანი იმისათვის, რომ ჩვენს ქვეყანას ჰქონდეს მშვიდობიანი განვითარების საშუალება. ჩვენ საკმაო წარმატებას მივაღწიეთ ამ მიმართულებით. ჩვენ გავაკეთებთ შესაძლებლობის მაქსიმუმს, რათა გამოყენებული იქნას რუსეთთან ურთიერთობის მთავარი ფორმატის - ჟენევის დისკუსიების პოტენციალი", -განაცხადა კვირიკაშვილმა.
მისივე თქმით, ასევე აუცილებლად გაგრძელდება აბაშიძე-კარასინის ფორმატიც.
"რა თქმა უნდა, გავაგრძელებთ ფორმატს, რომელიც შეიქმნა ბატონი ბიძინა ივანიშვილის პრემიერობის დროს. ყველა ჩვენი საერთაშორისო პარტნიორი აღნიშნავს ამ ფორმატის წარმატების შესახებ", -აღნიშნა კვირიკაშვილმა.
