პრემიერ-მინისტრობის კანდიდატის, გიორგი კვირიკაშვილის შეფასებით, შერიგებისა და სამოქალაქო თანასწორობის მინისტრობის კანდიდატს, პაატა ზაქარეიშვილს ძალიან კარგი იდეები აქვს, რომლის განხილვა შეიძლება.
როგორც რიგგარეშე სხდომაზე კვირიკაშვილმა განაცხადა, აფხაზებთან და ოსებთან შერიგების პროცესის მიმართულებით უფრო თამამი ნაბიჯები უნდა გადაიდგას.
მისი თქმით, ყველა სიკეთე, რომელიც ქვეყანაში შეიქმნება, უპირველეს ყოვლისა, ხელმისაწვდომი იქნება თანამოძმეებისთვის აფხაზეთსა და სამხრეთ ოსეთში.
„ჩვენი მოწოდება ძალიან ძლიერია, რომ ამ პროცესში მეტი დინამიზმი შევქმნათ. ჩვენ ამ მიმართულებით უფრო თამამი ნაბიჯების გადადგმა არ უნდა შეგვეშინდეს. პაატა ზაქარეიშვილს ძალიან კარგი იდეები აქვს. ჩვენ შეგვიძლია შევიკრიბოთ და ეს იდეები განვიხილოთ. სანუკვარ მიზანს დრო გვაშორებს, რომ ჩვენი ქვეყანა გავამთლიანოთ. დრო ჩვენი ქვეყნის წინააღმდეგ მოქმედებს. ჩვენ ეს არ უნდა დავუშვათ, ხელისუფლებას უდიდესი პასუხისმგებლობა გვაკისრია, რომ შერიგების პროცესი დავასრულოთ“, - განაცხადა კვირიკაშვილმა, რომლის გამოსვლის შინაარსი ეკა ხერხეულიძემ გააპროტესტა და დაინტერესდა, პაატა ზაქარეიშვილს რა მორალური უფლება აქვს მთავრობაში დარჩეს, მაშინ, როდესაც ის ანტისახელმწიფოებრივ განცხადებებს აკეთებს.
