ოპოზიცინერი დეპუტატი ირმა ნადირაშვილი ინტერესდება, პრემიერ-მინისტრობის კანდიდატი გიორგი კვირიკაშვილი მთავრობის წევრებს რა კრიტერიუმების საშუალებით შეარჩევს.
უმცირესობის სხდომაზე ნადირაშვილი მთავრობაში განსახორციელებელ საკადრო ცვლილებებთან დაკავშირებით, კვირიკაშვილის განცხადებას გამოეხმაურა.
„თქვენ მოგწონთ რა კრიტერიუმებითაც, მინისტრები ირჩევიან? ამ მთავრობას შეგვლიძლია „ქართუ ბანკის“ მთავრობა დავარქვათ. თქვენ „ქართუ ბანკის“ პრეზიდენტი იყავით, ქუმსიშვილი თქვენი მოადგილე იყო, ხოლო ხაბაძე აჭარის ფილიალის მმართველი. მთავრობაში მინისტრების დაწინაურება იმის მიხედვით ხდება, მათ რა დამსახურებები აქვთ ბიძინა ივანიშვილის წინაშე. ასევე მისი დაცვის ორი წევრი ძალოვან უწყებებს ხელმძღვანელობენ, ხოლო სერგეენკო მისი პირადი ექიმი იყო. გასაგებია, რომ ივანიშვილი კადრებს ასე არჩევს, რაც ქვეყანასაც ეტყობა, რადგან „ქართული ბანკის“ მოგება გაიზარდა, ქვეყანა კი, გაღარიბდა. გასაგებია, რომ მთელი მთავრობა „ქართუ ბანკის“ წარმატებაზე მუშაობს და არა ქვეყნის, მაგრამ მაინტერესებს, ხმას ამოიღებთ თუ არა მაშინ, როცა ივანიშვილი მინისტრობის ახალ კანდიდატებს შემოგთავაზებთ?! მთავრობაში ცვლილებების განხორციელებას რა კრიტერიუმებით აპირებთ?“, - მიმართა კვირიკაშვილს ნადირაშვილმა.
