საპრეზიდენტო პროექტი „ვისწავლოთ ქართული“ გაზაფხულზე განახლებული სახით გრძელდება და მას ქართული ენის შესწავლასთან ერთად კონსტიტუციის თეზისების შესწავლის კომპონენტიც დაემეტება.
დღეს საქართველოს პრეზიდენტის სასახლეში პრეზიდენტის მრჩეველმა ეთნიკური უმცირესობების საკითხებში სოფიო შამანიდმა საპრეზიდენტო პროგრამის მეორე ეტაპის დასრულება შეაჯამა, სხვადასხვა რეგიონებიდან ჩამოსულ პროექტის მონაწილეებს შეხვდა და რომლებსაც კურსის დასრულების სერთიფიკატები გადასცა.
პრეზიდენტის მრჩევლის განცხადებით, ერთ-ერთი მთავარი პრობლემა, რომელიც საქართველოში მცხოვრები ეთნიკური უმცირესობების წარმომადგენლების წინაშე დგას ეს არის მათი ინტეგრაცია ქართულ საზოგადოებაში. იმისათვის, რომ მათი ინტეგრაცია მოხდეს აუცილებლად უნდა იცოდნენ ქართული ენა. საქართველოს პრეზიდენტის ინიციატივით ჩვენ შევქმენით ის სივრცე, სადაც ნებისმიერ მსურველს შეუძლია მოვიდეს და ისწავლოს ქართული ენა.
„თუმცა მხოლოდ სახელმწიფო ენის ცოდნა არ არის საკმარისი ეროვნული უმცირესობების ინტეგრაციისათვის, პრეზიდენტის ინიციატივით ეთნიკური უმცირესობებს საპრეზიდენტო პროგრამის ახალი ფაზის ფარგლებში შეასწავლიან მათი უფლებებს, რომელიც ყველაზე უკეთ გაწერილია ქვეყნის უმთავრეს დოკუმენტში - კონსტიტუციაში. ანუ ქართულ ენასთან ერთად გაზაფხულიდან მათ საქართველოს კონსტიტუციის თეზისებსაც შეასწავლიან“,- განაცხადა სოფიო შამანიდმა.
საპრეზიდენტო პროგრამის ახალი ფაზისათვის დაიწერება ახალი სახელმძღვანელო, რომელშიც შევა ქართული ენის სასწავლო კურსი და ამონარიდები კონსტიტუციიდან. „ეს სიახლე ძალიან მნიშვნელოვანია იმისათვის, რომ უკეთ გავიაზროთ ჩვენი უფლებები და მოვალეობები, რომელიც კონსტიტუციითაა გარანტირებული“,- განაცხადა სოფიო შამანიდმა.
საქართველოს პრეზიდენტის ადმინისტრაციის უფროსმა გიორგი აბაშიშვილმა პროექტის მონაწილეებს საჩუქრად საქართველოს კონსტიტუცია გადასცა და საპრეზიდენტო პროექტის მეორე ფაზის წარმატებით დასრულება მიულოცა.
შეხვედრას ესწრებოდნენ პროექტის რეგიონული კოორდინატორები, თბილისის სახელმწიფო უნივერსიტეტის და სამცხე-ჯავახეთის სახელმწიფო უნივერსიტეტის პროფესორ - მასწავლებლები, რომლებმაც პროექტის გაგრძელება დადებითად შეაფასეს და მის საჭიროებაზე ისაუბრეს.
აღნიშნული პროექტის მეორე ეტაპი სამცხე-ჯავახეთის, ქვემო ქართლისა და კახეთის რეგიონებში განხორციელდა. მსმენელთა რაოდენობამ კი, 1700 გადააჭარბა.
