საქართველოს პრეზიდენტი გიორგი მარგველაშვილი თბილისის ყოფილი მერის გიგი უგულავას შეწყალებასთან დაკავშირებით საზოგადოების ნაწილის მოთხოვნას არ იზიარებს.
პრეზიდენტი საზოგადოების იმ ნაწილს პასუხობს, რომელთა წარმომადგენლებმაც მას უგულავას შეწყალების თხოვნით მიმართა.
„ჩემთვის ფასეულია მოქალაქე, რომელიც საზოგადოების ცხოვრებაში აქტიურადაა ჩართული. განსაკუთრებით ღირებულია თქვენი პოზიცია, იმ ადამიანებისა, რომლებიც სხვადასხვა სფეროში ჩვენი საზოგადოების გამორჩეული წევრები ბრძანდებით. გასაგებია თქვენი ემოცია პატიმრობაში მყოფი ადამიანის მიმართ. მსგავსი ემოცია ბევრჯერ გვქონია ჩვენი მიმტევებლური ბუნებიდან გამომდინარე“, - ნათქვამია პრეზიდენტის განცხადებაში.
მარგველაშვილი მიიჩნევს, რომ შეწყალების მექანიზმი არც სამართალწარმოებას, არც გამოძიებას არ ანაცვლებს და პოლიტიკურ მიზანშეწონილობას არ ემსახურება.
მისივე განმარტებით, შეწყალება კონსტიტუციური მოვალეობაა, რომელიც პრეზიდენტს მაღალ მორალურ და სახელმწიფოებრივ პასუხისმგებლობას აკისრებს.
„ამ, არსით ჰუმანური აქტის განხორციელებისას, არ ვიღებ გადაწყვეტილებას, რომლის მიხედვითაც, რომელიმე მსჯავრდებულს პრივილეგირებულ მდგომარეობაში ჩავაყენებ. ვერ მივიღებ გადაწყვეტილებას, რომელმაც შესაძლოა, საზოგადოებაში მსგავსი დანაშაულების მიმართ ზედმეტი ლოიალობის შეგრძნება გააჩინოს. აქედან გამომდინარე, ვერ გავიზიარებ თქვენს მიმართვაში დაფიქსირებულ მოთხოვნას“, - აღნიშნულია პრეზიდენტის პასუხში.
საზოგადოების წარმომადგენელთა ნაწილმა დღეს საქართველოს პრეზიდენტს თბილისის ყოფილი მერის გიგი უგულავას შეწყალების თხოვნით მიმართა.
