პრემიერ-მინისტრობის კანდიდატის, გიორგი კვირიკაშვილის განცხადებით, აუცილებელი იქნება ახალი პროგრამის წარმოდგენა, რომელიც გაითვალისწინებს დამწყები ბიზნესმენებისთვის ეფექტიანი მექანიზმების შექმნას.
გიორგი კვირიკაშვილი მთავრობის სამოქმედო გეგმაზე ფრაქცია „თავისუფალი დემოკრატების“ სხდომაზე საუბრობს.
„გასული სამი წლის მანძილზე, დიდი დროის დახარჯვა მოგვიწია მოსახლეობის პრობელების გადაჭრაში და სწორი საფუძველის ჩამოყალიბებაში ქვეყნისთვის მდგრადი ეკონომიკის მიღწევის გზაზე. არსებული რეფორმები, რაც წამოვიწყეთ, გაგრძელდება და მას ახალი მიმართულებები დაემატება. აქცენტი გადატანილი იქნება გამჭვირვალეობაზე და ეფექტიანობის გაზრდაზე“, - განაცხადა კვირიკაშვილმა.
მისი ცნობით, მთავრობის საქმიანობის უმთავრესი ქვაკუთხედი იქნება ეკონომიკური განვითარება და დასაქმება.
„ამ პრიორიტეტის ასახვა მოხდება დარგობრივ სტრატეგიებში. ეს იქნება სამეწარმეო სულისკვეთების განვითარება ქვეყანაში. კერძოდ, უკვე წამოვიწყეთ არაერთი სახელმწიფო პროგრამა მეწარმეობის განვითარებისთვის, რომელიცაა „აწარმოე საქართველოში“ და „მიკროგრანტების“ პროგრამა. შედეგად, მივიღეთ არსებული ბიზნესების მნიშვნელოვანი განვითარება. ასევე, აუცილებელი იქნება ახალი პროგრამის წარმოდგენა, რომელიც გაითვალისწინებს დამწყები ბიზნესმენებისთვის ეფექტიანი მექანიზმების შექმნას. მხედველობაში მაქვს ახალგაზრდები, რომელთაც საინტერესო ხედვები აქვთ. მათ იდეების განხორიცლეება უნდა შეძლონ. მათ უნივერსიტეტის დამთავრების შემდეგ, საკუთარი ბიზნესის წამოწყება უნდა შეძლონ და ქვეყნის ეკონომიკაში ახალი აგურის დადება. ასეთ ბიზნესებს აქვს ყველაზე მაღალი განაკვეთი იმისა, რომ შეიძლება წარუმატებელი აღმოჩნდეს, თუმცა, ვინც წარმატებული აღმოჩნდება, ისინი არსებული ბიზნესების ზრდის ტემპს წარმატებით აღწევენ. ქვეყნის ეკონომიკის ზრდისთვის უმნიშვნელოვანესი ფუნქცია ეკისრება დამწყები ბიზნესის განვითარებას და ქვეყანაში შევძლებთ საშუალო ფენის ჩამოყალიბებას. ეს იქნება უახლოეს პერსპექტივაში უმნიშვნელოვანესი საკითხი“, - დასძნა პრემიერობის კანდიდატმა.
